(ERGO) – Cabdi-mahad Cabdillaahi oo ku nool magalada Cadaado ee gobolka Galgaduud wuxuu weli la daalaa dhacaya saameynta ganacsigiisa ay ku yeelatay lacagta shilin Soomaaliga labo sano ka hor laga diiday gobollada dhexe ee waddanka. Ganacsadahan iyo dadka oo tukaanley u badan waxaa ka burburay ganacsigooda kaddib markii ka qasaartay lacag malaayiin ah shilin Soomaali ah oo ay dukaamada ay ku haysteen sabab la xiriirta sariflayaasha iyo dadka leh gancsiyada waawayn oo sheegay in lacag been abuur ah la soo geliyay suuqyada gobolka Galgaduud.
“Markii lacagtu dhacday, lacag 55 malyan ah oo udhiganta 2,000 oo dooler ayaa iga dhacday, Waxaan u laabtay noloshii aan markii hore ka soo bilaabay ee hoosaysay,” ayuu yiri Cabdi-mahad
Cabdi-mahad ayaa lacag $60 oo uu ehelkiisa ka helay ku bilaabay sannadkii 2011-kii in alaabaha yaryar ee bagaashka ku wareejiyo gaari-gacan gudaha magaalada. Balse dedaal badan oo uu bixiyay kaddib waxaa uu ku guulaystay in ganacsigiisa uu balaariyo. Nasiib-xumo waxaa saamayn balaaran ku yeeshay ganacsigiisa diidmadii shilin Soomaaiga ee bishii toddobaad ee 2017kii taa oo u horseeday in uu dib u bilaabo hardankii uu kula juray noolasha adag. Waxa uu Raadiyo Ergo u sheegay in lix bil kaddib uu dib u tijaabiyo ganacsiga isagoo markaan $300 oo dayn ah iyo raashin dad macaamiishiisa ah ay u dhiibtaan oo uu u sii lacageeyo ku galay.
“Dadkii Markii hore aan ka soo adeegan jiray ayaa isoo siiyay dayn aan badnayn iyo xoogaa waxyaabo kale oo aan u sii lacageeyo, Halkaas ayaan ka dhex raadiyaa $2 ama $3,” ayuu yiri Cabdi-mahad oo ah abbe dhalay 4 wiil iyo laba gabdhood. Dhibbaatada ugu badan ee uu Cabdi-mahad wajahaya ayaa ah cillado ku yimaada lacagaha la isugu diro telefoonnada gacanta ee loo yaqaanno EVC-ga.
“Marka aad suuqa timaado nuska saac ee subaxnimo oo hal saac gaaro, oo dad badan kaa adeegtaan ayaa waxaa dhacaysa in cilad ay ku timaado adeegii mobilkii illeen wax gacan ah ma jiraane waa EVC-ye,” ayuu ku cataabay Cabdi-mahad oo sheegay in uu dhib ku qabo cilladaha soo noqnoqda ee EVC-ga.
Khayre Muuse Faarah oo ah xoogsade ku shaqaysta gaari-gacan gudaha magaalada Cabudwaaq waxaa uu Raadiyow Ergo u sheegay in uu la la daaladhacayo dhaqaalo xumo uu sabab uga dhigay isticmaal la’aanta shilin Soomaaliga tan iyo sanadkii 2017. Sida uu u sheegay Raadiyow Ergo, waxaa uu shaqaynsan jiray lacag gaaraysa labo boqol oo kun shilling maalintii ka hor inta aan la diidin lacagta shilinka.
“Baahida noohaysa lacagta shilin Soomaliga ah, waxa weeye, waxaa ay ahayd wax kuu muuqda oo aad arkaysid oo gacanta laga dhiibayo hadda wax noo muuqdaba ma haysano, Lacag Baraka badan ayay ahayd, waan ku qanacsanayn inta aan helno, Lacagta hadda socota waxaa ay igu ka liftay in aan aqoon waayo, si aan familkayga wax u kala siiyo,” ayuu yiri Kheyre oo ah abbe haysta afar gabdhood iyo seddex wiil.
Faaduma Axmed Cabdillahi oo iyna biibito lagu iibyo sharaabka qabow iyo shaaxa ku ku leh magaalada Cabudwaaq waxaa ka qasaaray lacag gaaraysa afar milyan oo shilling Soomali ah sanadkii 2017ka. Balse dhibaatada ugu wayn waxa ay kala kulantay isticmaalka adeegga EVG-ga oo aysan horay u adeegsan jirin. Faadumo bilowgii sanadkan ayay bilowday in maadada xisaabta iyo far-Soomaliga barato kaddib qasaaro ay kala kulantay aqoon la’aanta adeegga ay isticmaalayso
“Shanqarta taleefoonka ayaan dhageysan jiray oo marka uu ciyo ayaan dadka dhihi jiray waan haystaaye iska taga, Kaddib qasaarooyin markay i soo gaareen oo taleefoonka marka la iifiryo la i oranayo intaas baa ku jirta, ayaan isku taxluujiyay in aan waxkabarto, EVC-ga qof aan xisaabta iyo farta aqooni ma isticmaalikaro,” ayey tiri Faadumo oo uu qoyskeeda ka kooban yahay shan ruux.
