(ERGO) – Boqollaal qoys oo deganaa xaafado uu maro togga weyn ee kala qeybiya qaar ka mid ah xaafadaha magaalda Baardheere gobolka Gedo ayaa ku barakacay roobab culus oo daadad watay oo oo ka da’ay magaalada iyo hareeraheeda.
Qoyska Xabiibo Nuurow Maxamed oo ka kooban 10 ruux waxa uu ka barakacay xafadda Xabaal-caday kaddib markii roobab daadad xoogan wata ay ku dhufteen gurigooda labo habeen ka hor. Waxay Raadiyow Ergo u sheegtay in iyada iyo carruurteeda ay guriga kala soo baxsadeen naftooda.
“Annagoo hurdayno, ayaa biyo nasoo galay ka war helnay, taleefono ayaan dirsanay, si caruurta noogu la badbaadiyo,” ayay tiri Xabiibo.
Waxaa sidoo kale qoyskeedu uu dulsaar yahay reero kale Nadiifo Salaad oo roob socday 12 saacadood uu ka barakiciyay gurigeeda. Nadiifo ayaa sheegtay in hadda caqabad ka haysato dhanka nolosha oo reerkeeda hal wakhti haddii ay helaan dabka shitaan.
“Aniga gurigayga wuu maran yahay, wixii dhan daadka la tagay, masiibo tii ugu weynayd ayaa nagu dhacday, tanoo kale biyo baxidii 1997 ayaa noogu dambeysay,” ayey tiri Nadiifo.
Muxumed Maxamed Yuusuf oo ah gudoomiyaha xaafada Buulo-geediyo ee degmada Baardheere ayaa Raadiyow Ergo u sheegay in xafada ay ka barakaceen ilaa 350 qoys labadii maalin ee la soo dhaafay.
“Dadkii deganaa xaafada oo u badan dad danyar ah ayey biyuhu barakiceen, biyaha daadka waxay dumiyeen musqulihii xaafadda, waxaa dumay ilaa 10 guri oo mundulo iyo baraakooyin ahaa. Ilaa 20 neef oo ari ah biyaha ayaa qaaday,” ayuu yiri Muxumed.
Cali Maxamed iyo qoyskiisa oo ka 11 qof waxay barakac ku yihiin xerada Liibaan ee ku taalla duleedka Baardheere. Wuxuu Raadiyow Ergo u sheegay in cunno iyo hoy midna aysan haysan qoyskiisa.
“Waxaan ahaa xoogsade noloshiisa ay ku tiirsan tahay suuqa xoolaha, suuqii iyo magaaladana way kala go’an yahiin, guryahiina kuma laaban, dhiiqo ayaa dhex fadhida, guryaha kharash aan ku hagaagsadana ma qabi,” ayuu yiri Cali.
Roobabk daadad wata ayaa sidan oo kale bishii hore barakiciyay dad ka badan ilaa kun qoys oo deganaa xeryaha Xabaal-cadeey,Musawa, Buulo-geed iyo Horseed.
Raage Axmed Maxamed waa Madaxa Mashaariicda iyo Horomarinta maamulka degmada Baardheere waxaana uu Raadiyow Ergo u sheegay ilaa 4,700 oo qoys ay ku barakaceen fatahada uu sameeyay Webiga Jubba iyo daadadka roobabkii da’ayay tan iyo Octobar.
