(ERGO) – Lix iyo tobad goobood oo dhul daaqsimeed la xirmaystay iyo laba iyo tobad god barkadeed ayaa maamulka magaalada Oog ee gobolka Sool oo kaashanaya odayaasha deegaankaasi tobankii maalmood ee la soo dhaafay burburiyeen.
Bishii Julaay ee sanadkan ayaa waxgaradka deegaankaasi ku heshiiyay in dhamaan la baabi’iyo dhul-xirmooyin seerayaal ah oo dad si gaar ah uga oodanayaan dhul daaqsimeedkii xoolaha, iyo sidoo kale deegaamaynta cusub oo laga hirgelinayo dooxooyinka xoola daaqeen ah.
Arrintan ayaa timid kaddib markii uu muranno dhexmaray dadka seeraha iyo degamaynta samaynaya iyo xoolodhaqatada.
Gudoomiye ku-xigeenka degmada Oog, Cabdi Iidaan Jaamac ayaa Raadiyaha Ergo u sheegay in dhibaatadu seeraysigu labadii sano ee ugu danbaysay ay ka taagnayd afar dooxo oo waaweyn oo ah dhulkii xoolaha daaqayeen.
“Dadka xidhay, mid waliba wuxuu odoonayaa meel uu gaar oo boqolaal mitir ah, beerana ma aha, wax la aqbali karna ma ahan arrintaani,” ayuu yiri Cabdi.
Dooxooyinka la xidhay waxaa ka mid ah Bali-qoribad oo koonfur ka xigta Oog.
Dooxadani ayaa ah mid wayn oo ilaa 60km oo isku wareeg ah, dhamaanna waa lagu xidhay ood, silig iyo dhagxaan.
“Dadka dooxooyinka xidhay waa ilaa 25 qof oo qaarkood qurbajoog yihiin, Waxayna doonayaan in ay seeerayaal ay geel ku xeraystaan ka samaystaan, hadda wixii oo dhan waan ka qaadnay,”ayuu yiri Cabdi Iidaan
Sidoo kale dooxooyinka la xidhay waxaa ka mid ah Mareer-joog, Kala go’da, Buta-wayne, iyagana waa laga qaaday hadda seerayntii.
Go’aamada laga soo saaray ayaa waxaa ku jira in 3 km wixii ka baxsay magaaladda Oog ay tahay xooladaaqeen oo aan wax xidhmo ah laga samayn Karin.
Oday Aadan Cabdi Maacuun oo ka mid ah odayaasha deegaanka Oog,ee go’aankaasi soo saaray ayaa sheegay in xoolodhaqatadu daaqsinkay helaan uu ku tiirsan yahay dooxooyinkaan oo marka roobabku da’ana ah meelaha biyaha ay ku hakadaan xooluhuna ku baxsaan xilliga jiilaalka,
“ Qofkii reer miyiga ahaa markuu waayo meel uu neefkii u daaqo waxaa khasab ah in gacan ka hadal imaanayo, arintaasi si aanu uga hortagno ayaanu go’aamadan u gaarnay,” ayuu yiri Aadan.
Sidoo kale odayaasha iyo maamulka ayaa isku raacay in meel aan ahayn deegaanka aan laga qodi karin barkad, waxaana la baa’bi iyay ilaa 12 god oo laga qoday oo la doonayay in laga dhigo berkado.
Cabdi Muuse Axmed oo ka mid ah dadka xooladhaqatada ah ee deggan Oog ayaa sheegay in dhul ahaan degaanka oog uu yahay buuro iyo dooxooyin, oo ay buuraha wax daaq ahi lahayn, laakiin dooxoyinka ay yihiin halka xoolihiisu daaqaan.
“Durba markii dhulkii laga qaaday xidhmooyinkii xoolihii waxay heleen meel ay daaqaan. Meel ay ceelkii uga arooraan, markii hore dhibka buurtaan ku celinaynay xoolaha,” ayuu yiri Cabdi.
