(ERGO) – Cali Axmed Cismaan oo ku nool degmada Afmadow ahna muruqmaal waxaa ku adkaatay in uu maareeyo nolasha qoyskiisa kaddib markii raashiinka qutuldaruuriga ah uu kor u kacay. Sare u kaca raashiinka ayaa yimid kaddib markii roobab lixaadle leh si xidhiidh ah uga da’aayeen deegaannadaas iyo Kismaayo sadexdii todobaad ee ugu danbeeyay taa oo sababtay in ay jidadka gala magaaladaas xidmaan
Cali oo la hadlay Raadiyow Ergo ayaa sheegay in celcelis ahaan uu maalintii helo lacag dhan 90,000 oo Soomaali shilin ah, taa oo aan ku filnayn qoyskiisa.
“Kiilaha bariiska ayaa intii aan roobka da’in, waxaa aan ku iibsan jiray lacag dhan 16,000 oo ah shilin Soomaali balse hadda waxaan ku iibsanaa 24,000 shilin Soomali ah,” ayuu yiri Cali.
Gaadiidkii keeni jiray raashiinka ka yimaado magaalada Kismaayo ayaa waxaa la sheegay in muddo ay ku xanniban yihiin waddada isku xirta Afmadow iyo Kismayo. Raashiinka oo gabaabsi ku sii ah magaalada ayaa waxaa uu sababay in uu sicirbarar qiimaha la kala siisan jiray, sida uu sheegaayo Deeq Xassan Xuseen, oo ka mid tahay ganacsatadda Afmadow.
Deeq ayaa sheegay in kiisha sonkorta ah uu suuqa ka afmadow ka maraayo 640,000 shilin Soomaaliga ah halka kan bariiska ah uu maraayo 680,000, burka aya isgana maraaya 820,000.
“Badeecada waa sii gabaabsi, raashinka yaalla wuu sii yaraanayaa, hal bil wax gaadhi ah oo badeeco wadda oo magaalada imaaday ma jiro,” ayuu yiri Deeq oo intaas ku daray in ilaa 25 gaari oo raashiinka u sidda magaalada ay ku jiraan inta u dhexayso magaalooyinka Kismaayo iyo Afmadow.
Waxaa sidoo kale kor u kacay qiimaha lagu raaco baabuurta u kala gooshto magaalooyinka. Gadiidka u kala goosha Dhooblay iyo Kismaayo ayaa hadda lagu raacaa $80 dollar qofkii halka uu markii hore ka ahaa $30. Axmed Cismaan Xussen oo doonayay in uu u safro magaalada Dhooblay ayaa hadda wuxuu ka rajo dhigay in uu baxo kaddib markii uu awoodui waayay nooliga. Waxaa uu Raadiyow Ergo sheegay in wax lacag ah uu ka watay kontan dollar balse nooligii uu noqday $80 dollar, haddana uu ku qasban-yahay in uu joogo inta wax iska badalayaan.
Sidoo kale waxaa iyana aan iman gaadiidkii ka iman jiray magaalada, sida uu sheegaay, guddoomiyaha gadiidlayda u kala safra Dhooblay iyo Kismaayo, Xasan Axmed Saahid. Guddoomiyaha ayaa sheeegay in maalin walba ay bixijireen ilaa 20 gadiid ah oo ah nooca yaryar ee taksiga loo yaqaanno balse hadda aysan bixin roobka dartii.
“Baabuurtii soo baxay jimcihii saaka ayay soo galeen, nooliga waxaan tamartooda ahayn ayaa dadkii laga qaadaya, duruufta iyo waqtiga ayaa keenay, waxaana ugu daran dadka xanuunsanaya ee donayay in ay dhakhtar aadan maaddaama aan diyaarad jiri, baabuur badan oo matoorka biyo jiiday oo dhexda yaalla ayaa jira,” ayuu yiri Xasan.
