(ERGO) – Tobaneeyo dhul-beereed ah oo ku yaalla gobolka Awdal ee Somaliland ayuu ayax baabi’iyay, isagoo qasaaro lixaad leh u gaystay wax-soo-saarkii beeraha ee gobolkaas.
Beeralay ku nool gobolkaas ayaa Raadiyow Ergo u sheegay in ayaxu weeraray tuulooyinka kala ah Xariirad,Xaliimaale, Maraaley,Ceel Baxey, Qoqol, aroorseel iyo Weeraar.
Ayaxaan oo la sheegay in uu ka yimid dhanka Itoobiya ayaa cunay dalagyo isugu jira yaanyo, kabash, bocor iyo dalagyo kale.
Suleemaan Xasan Saciid oo ah guddoomiyaha beeralayda ku nool tuulada Xaliimaale ayaa u sheegay Raadiyow Ergo in ayaxu uu ka baabi’iyay dalag ku abuurnaa beertiisa oo cabir ahaan gaaraysa 27 hektar. Ayaxa ayaa beerta weeraray bishii la soo dhaafay.
“Wax celin karo ma lahan, xilliyadiisa ugu horeeyo ayaa macquul ah in wax laga qabto balse kan xitaa dasadaha la qaraaco wax kama taraan,” ayuu yiri Saleemaan oo sidoo kale sheegay in 20 beerood oo ku yaalla tuulada uu ayaxu baabi’iyay.
Saleemaan ayaa sheegay in uu qasaaro wayn soo gaaray maaddaama uu ayaxu ka cunay wixii u beernaa oo isugu jiray yaanypo, basal iyo qaro.
“Waxaan rajaynaayay in aan xabxabka kaliya aan ka helo $4000, beertaan waxaan ka shaqaynaayay muddo seddex bilood oo xiriir ah, qarash bandanna waan galshay,” yiri Saleemaan.
Shide Cawaale Good oo isna ka mid beeralayda Xaliimaale oo beertiisa ay waxyeello ka soo gaartay ayaxa ayaa wuxuu sheegay in ayaxu uu ahaa mid hawada dhan qariyay.
Markii I dulmaraayay ayax, waxay ahayd sida aniga oo har hoos jooga, xitaa ma aanan arkayn qarraxda,” ayuu yiri Shide,
Wuxuu tiiraanyo ka muujiyay qasaaraha ka soo gaaray.
“Kolay kolka uu dalagu soo baxo, siyaabo badan baa loo isticmaalaa, marka uu garawgu dadka ka goosto, qoysas badan baa ku noolaada, kolka laga tago garawga, caleenta waxa ku noolaada geela iyo lo’ da iyo munaafacaad badan lixbilood oo dhan baa lagaga baxaa,” ayuu yiir Shide.
Waxaa uu sheegay in dalagga u saarnaa beertiisa uu beeray bishi toddoobaad halka qaarna uu beeray billowgi bishan sagalaad.
Cabdi Suldaan oo beer ku leh deegaanka Xaliimaale ayaa qaba in Ayax uu ka awood badan yahey kii hore.
