Dagaallo u dhexeeyey ciidamada dowladda federaalka ee Soomaaliyo iyo kuwa AMISOM oo wada socda iyo Al-Shabaab oo maalintii Talaadada ee toddoabadii bishan ka dhacay tuulada Gaawiroow oo 6 km dhinac koonfureed uga beegan degmada Afgooye ee gobolka Shabeellaha hoose ayaa sababay in ay dhintaan toddobo qof oo shacab ah oo lagu sheegay in ay beeraley ahaayeen. Lix kale ayaa iyaguna dhaawacyo kala duwan kasoo gaareen, kuwaas oo labo haween yihiin iyo ilmo yar oo toddobo sano jir ah. Dhaawacyada ayaa hadda lagu dawaynayaa cisbitaalka Madiina ee magaalada Muqdisho, sida ay innoo xaqiijiyeen ehelada dadkan oo isbitaalka aan kula kulanay iyo maamulka cisbitaalkaba.
Dhacadaas iyo dagaallo kale oo ka sii horreeyey oo ilaa horraantii bishan ka dhacayey tuulooyinka Gaawiroow , Kuntuwaarey , iyo Degmada Qoryooley ayaa keenay 450 qoys oo ka soo barakacay tuulada Gaawiroow ay soo gaaraan sagaalkii bishan ilaa iyo 12kii bishan. Barakacayaasha ayaa gaaray xeryaha kala ah Rajo, Sayidka iyo kuwa ku yaalla dhinaca km13 ee duleedka Muqdisho.
Cali Aweys Ibraahim waa aabaha qoys ka kooban siddeed qof, wuxuu qayb ka yahay qoysaska ka soo barakacay tuulada Gaawiroow. Waa markii ugu horeysay oo uu barakac noqdo. Weli ma aysan helin wax ay ku dhistaan aqal cooshad ah. Waxaana ay la hooydaan caruurtiisa iyo xaaskiisuba qoysaska kale, isaguna xerada dhexdeeda ayuu dhigtaa kartoomo uu ku seexdo habeenkii.
Waxaa sanadkan u tacbanaa dhul beereed cabirkiisu yahay labo darab taasi oo uu beertay muddo ku simman labo bil. Waxaana u beernayd gallay, nooca beertiisa ayaa ahayd mida ku baxda waraabka biyaha webiga.
Cali ayaa Ergo u sheegay in dhul-beereedkaasi iyo gurigiisa oo afar qol ka koobnaaba uu isaga soo cararay si uu u badbaadiyo nolosha qoyskiisa, markii ay saamayn ku yeelatay madaafiic dhinacyadu isdhaafsanayeen ay ku dhacday meel ku dhow gurigiisa uuna ku dhaawacmay mid kamid ah carruurtiisa kaasi oo gacanta waxyeelo ka soo gaartay firirna uu ka galay.
Xaalada wiilkiisa ayaa hada ah mid wanaagsan, waxaana dhaawaca soo gaaray uu yahay mid firir ah oo dhinaca gacanta ah . Wiilkani wuxuu soo dhaawacmay toddobadii bishan.
“Dhulkaygii beerta uu iiga tabcanaa, gurigeyga, dhammaan wixii ii dhexyaalay ee alaab ahayd waxba kama soo qaadan, keliya waxaan ka xirnayn mooyee, hadda anniga iyo qoyskeeyga xeradan ayaan ku noolnahay halkan ayaan soo miciin bidnay waayo halkaas xaaladu waa mid Qatar ah lagumana noolaan karo”ayuu yiri.
Cali oo hada ku jira xerada Rajo degmada Hodan oo ay kula jiraan 200 oo qoys oo ay isku meel ka soo barakaceen ayaa ku soo gaaray halkani gaadiid ay ka soo raaceen Afgooye, inta ka horeysayna ay soo lugeynayeen maadama deegaanku dagaalo hareeyeen gaarina aanan la helaynin.
Carruurtiisa ayaa marka laga reebo kan ugu wayn inta kale ay dhiganayeen dugsi qur’aan afar kamid ah carruurtiisa ayaa dhiganaysay dugsi, kuwa kalena waxay ahaayeen kuwo waawayn oo kala shaqayn jirey beerta.
Beeralaydan barakacay waxay hadda uun ka soo kabanayeen abaaro saamayn ku yeeshay dhul beereedkooda, tacab badana uu uga qasaaray. Waxay dadka aan la hadalnay codsadeen in dagaallada lagu kor dagaallamay iyo dhibaatada ka soo gaareysa la joojiyo si ay deegaannadooda si nabad ah dib ugu laabtaan oo noloshooda ay soo ceshtaan.
Xumeer Nuur Cusmaan oo iyada iyo qoyskeedu ka soo barakaceen deegaanka Gaawiroow ayaa Radio Ergo u sheegtay in 78 qoys ay iskala soo lugeeyeen toddobaadkii hore si ay uga soo baxsadaan dagaalo ay sheegtay inay deegaanka ku soo noq-noqdeen.
“Waan soo lugeynay ilaa lix saacadood, salaadii subax xilli ay ku beegnayd ayaan socodka soo billaawnay nasiib wanaagse dhexda waxaa naga soo caawiyay gaari , sidaas ayaana ku soo gaarnay degmada Afgooye,”ayay tiri Xumeer oo ah hooyada labo carruur ah. Wakhtigan waxay ku nool yihiin xerada Rajo KM13 duleedka Muqdisho, mana haystaan hooy iyo nolol wanaagsan oo halkan waxay ku yihiin dad cusub. Waxay sugayaan inay helaan caawin iyo dib u dejin inay ka helaan maamullada Garasbaaley iyo Kaxda. Dadkan weli ma aysan helin wax cawimaad ah .
Guddoomiye ku xigeenka arrimaha bulshada iyo maaliyadda ee Maamulka Gobolka Shabellaha Hoose Cabdifataax Yuusuf Cabdule ayaa Raadiyo Ergo u sheegay in ay ka warhayaan dadka gobolka uga barakacay dagaallada socda, hase ahaate wuxuu sheegay in guud ahaan gobolku ka socdo howlgal ciidan.
Gobolka shabellaha hoose waxaa ka jira howlgallo ay dowalddu uga soo horjeedo Al-shabaab, waxaana ka dhaca dagaalo taasina waxay saamayn ku yeelataa dadka shacabka ah oo dhowr jeer ay waxyeelo ka soo gaartay dagaaladaasi dhinacyada u dhaxeeya.
