Axmed Cali Maxamad oo ah aabbaha qoys siddeed qof ah, muddo bil iyo toban maalin ah ayuu markasta dhistaa buul yar oo ay dabeyshu ka dumiso, wuxuu barakac ku yahay duleedka deegaanka Garow-waalle oo Gaalkacyo koonfurta kaga beegan 167 km, kaddib markii roobkii guga oo ka da’ay halkaas uu sababay inay biyo fariistaan deegaanka.
Hadda isaga iyo carruurtiisu waxay ku nool yihiin buush yar oo qoraxda maalintii iyo dhaxanta habeenkii ay ka galaan kaas oo uu ka sameeyay geedo, dushana uu ka saaray bac ay ku caawiyeen qoys ehelkiisa ah oo deggan miyiga Garow-waalle.
Guriga Axmed cali oo ka koobnaa laba qol iyo dukaan ayaa gabi ahaanba waxaa dumiyey daadkii ka dhashay roobka, dukaanka ayuu ku iibin jiray alaabaha bagaashka iyo raashinka. Biyaha way yaraadeen laakiin guriga ayaa u baahan dhisme.
“Tan noogu adag waa hoyga buushka yar ee aan dhiso dabayl ayaa durba bitinaysa, oo dabaylihii xagaaga ayaa biloowday. Raashinka qoys xoolo dhaqato ah oo ehelkeena ah ayaa noo keena, habeenkii uun baan wax aan cuno helna, ehelkaas ayaan ku baxsannaa oo cunada naga taageera”. Ayuu yiri Axmed
Axmed ayaa sheegay in hanti dhan 9 milyan oo shilinka Soomaaliga ah, oo doolar ahaan u dhiganta $300 uu ku waayay daadka, taas oo taalay dukaankiisa xilligi uu roobka da’ay sagaalkIi bishii May.
“bagaashka iyo raashinka waxaa wehliyay oo aan iibin jiray dharka halkaas oo aan ka soo saari jiray nolol maalmeedka qoyskayga balse hadda waxba faro ku mahayo, waxaan ka mid ahaa dadka deegaanka ugu ganacsiga roon, haddase waxaan ahay barakac buush ku hoyda”. ayaa hadalkiisa raaciyay Axmed.
Gudoomiyaha deegaankka Garow-waalle Maxamed Cabdi Garabay, ayaa Raadiyo Ergo u sheegay in 96 guri oo deegaanka ku yaalay oo ka samaysnaa dhagax ay ku dumeen roobabkii daadadka watay, tuulada qoysaskii degganna ayuu sheegay in aysan awood u la hayn in ay dib u dhistaan oo nolosha maalin laha ah ay la halgamaan.
Hay’ada IRC ayaa dabayaaqadii bishii hore 80 qoys oo ka tirsan kuwii dhibaatada ka soo gaartay daadadka roobka siisay lacag $60 doolar ah qoyskiiba, kaddib markii hay’addu awoodi waysay in raashinka ay soo mariso waddooyinka soo gala deegaanka oo biyo badan ay ceegaageen.
Deeqo Cabdi Yaasiin waa hooyada qoys toddobo carruur ah, waxay kamid ahayd dadkii u barakacay duleedka Garow-waalle. Iyada iyo carruurteeda in ka badan bil waxay ku hoydaan geed hoostiis oo ay bac saartay geesanaha ka banaan, carruurta ayay sheegtay in buste qoys la deggan ay siiyeen ay u huwiso xiliga habeenkii ah.
Ka hor inta aysan dhibaatada ku dhicin Deeqo waxa ay ka ganacsan jirtay qalidda xoolaha gaar haan ariga, waxa ay halkaas ka soo saaran jirtay nolol maalmeedka caruurteeda haddase taas meesha way ka baxday, maalinkii ayay isheegtay in neef ama laba neef oo ari ah ay qali jirtay kuwaas oo ay soo iibsato kaddibna hilibka xoolahaas ay qasho ay dib u iibin jirtay. waxa ay xustay in faa’ido lacageed oo ka badan boqol kun ay ka heli jirtay maalin walba.
“Rajada aan dib ugu laaban karno tuulada majirto, waxaan soo fiiriyey laba maalin kahor weli biyo ayaa fadhiya gurigii iyo musqushii, deedkiina waa dumay, waxaan qabaa welwel cuno iyo hoy xumo ah, waxaan codsan lahaa in nala soo gargaaro oo xilligan adag gargaar ayaan u baahanahay”. Ayay tiri Deeqo.
120 qoys ee degganaa deegaanka waxay u barakaceen goob dalcad ah oo duleedka bari kaga beegan garow-waalle, roobka gu’ga inkasto sidii hore uusan u xooganayn haddana weli waxa ay wajahayaan roobab kale oo ka da’aya garow-waalle.
Gudoomiyaha garow-waalle ayaa Raadiyo Ergo u sheegay in 20 qoys oo guryahooda rajo lahaa oo dacalka tuulada ku yaalay ay ku dhiiradeen inay dib ugu laabtaan balse ay ku sii nagaan waayeen maaddama musqulihii wixii ku jiray biyuhu ay banaanka keeneen, halkii lagu barakacayna in ay dib ugu soo laabteen.
