Bulshada degmada Buuhoodle ee gobolka Togdheer ayaa markii ugu horreysay cabaya biyo nadiif ah oo qiimo jaban kadib markii labo ceel-biyood laga qoday magaalada. Labada ceel oo duleedka magaalada magaalada ku yaal ayaa toddobaadkan sagaal tubo oo laga soo jiiday gaarsiiyay gudaha magaalada.
Tubooyinkaas ayaa si bilaash ah biyaha ku siinaya xeryaha dadka deegaanadooda kasoo barakacay, dugsiyada iyo suuqyada, sida uu sheegay Faarax Xaaji Cabdi oo ka tirsan Ururka Gargaarka Soomaaliyeed. Ururkan oo kaalmo ka helaya sanduuqa badbaadada carruurta ee UNICEF ayaa ceelka qoday horraantii sanadkan, laakiin 8 bil ayey qaadatay in tubooyinka ceelka la gaarsiiyo magaalada.
Dadka degmada Buuhoodle ayaa horey ugu tiirsanaa biyaha roobka ee ku hoora barkadaha iyo balliyada oo foostadii la iibin jiray 30,000 oo shilin Soomaali ah. Biyahaas ma aheyn kuwo daweysan, waxaana dhici jirtay inay cuduro ka dhashaan xilliyada jiilaalka. Haddaba, tubooyinka labada ceel ayaa bilaash u ah dadka deegaanadooda kasoo barakacay, dugsiyada iyo suuqyada, iyadoo dadka meelaha kale uga dhaansi imaadana foostadii laga siiyo 10,000 oo shilin.
Laakiin dadka soo barakacay ah ee ku nool Buuhoodle ayaa sheegay inay faa’iido weyn ku qabaan biyaha nadiifka ah ee hadana bilaashka ah ee xerada laga hirgeliyay. “horey marar badan biyo weynu waayi jirnay, amaba ma awoodi karin in aynu iibsano. Hadda haddii aad habeen dhexaadka soo kacdo, xerada dhexdeeda ayaa biyo ka heleysaa,” ayuu yiri Cabdiraxmaan Sheekh Khaliif oo ka mid ah dadka ku nool xerada Suweeto ee degmada Buuhoodle.
Ma ahan dadka deegaanadooda kasoo barakacay oo keli ah, laakiin xitaa dadka xoolo-dhaqatada ah ayaa faa’iido weyn ku qaba tubooyinka biyaha ee laga hirgeliyay degmada. Geela iyo arriga ayey usoo waraab keena xarumaha biyaha ee Buuhoodle. Xuseen Jaamac oo xoolo-dhaqatadaas ka mid ah wuxuu sheegay xooluhu jecel yihiin biyaha cusbada leh ee ceelka ayna caafimaad ka helaan.
“Geelu isagoon daaq helin ayuu ku joogi karaa biyaha ceelka keliya,” ayuu yiri Xuseen. Wuxuu intaa ku daray in ay ku faraxsan yihiin in biyaha ceelka ay hadda kadib u heli doonaan xoolahooda.
Khadar Cawl Ismaaciil/FM/MR
