In ka badan kun qoys oo barakcayaal ah kuna nool 10 xero uu ku yaal duleedka degmada Buurdhuubo ee gobolka Gedo ayaa sheeganaya inay haysato xaalado bani’aadamnimo.
Bishaar Maxamed oo ka mid ah gudi ay leeyihiin dadka ku jira 10 xero ayaa Ergo u sheegay in qoysaska oo tiradoodu gaarayso 1600 ay la daalaa dhacayaan arrimo ay ka mid yihiin cunno yari, caafimaad xumo iyo waxbarasho la’aan, wuxuu intaa ku daray in dadkaan ay isugu jiraan beeraleey, xoolo dhaqato iyo kuwa ka soo cararay dagaalladi ka dhacay degmada Buurdhuubo sanad ka hor.
Aamino Axmed Xasan waa hooyo haysta 6 carruur ah kuna sugan xerada Buulo-huufey oo 5 KM u jirta degmada Buurdhuubo, ayaa Radio Ergo u sheegtay in sanad ka hor ay ka soo qaxday Buurdhuubo, xiligaasna ay gadan jirtay miis yar oo ay noolsha reerka ka dabari jirtay.
Aamina ayaa intaa raacisay in hadda xaaladda ay ku sugan yihiin ay aad u liidato oo dadku cunno ahaan ay isticmaalaan qaar ka mid ah caleenta geedaha sida caleenta geedka Raasow, si aysan dadku gaajo ugu dhiman.
Cabdiraxmaan Xuseen oo hadda ku sugan xero lagu magacaabo Surriyo, ayaa Radio Ergo u sheegay in halkaasi ay ka jirto dawo la’aan, gaajo, hoyi la’aan iyo baraca.
Degmada Buurdhuubo iyo tuulooyinka ku xeeran ayaan ah kuwa go’doon ah oo waxna galin waxna ka bixin muddo sanad iyo laba bilood ah taasi oo sii xumayneya xaaladda nolasha ee dadkan ku barakacay gudaha degmada iyo banaankeeda.
Axmed Cumar
