Cunista iyo ka ganacsiga cuntadda gudaha ka so baxda ayaa ku sii badanaya Hargeysa, markaad aragto wadooyinka ayaad arkaysaa dad doonaya keliya cuntooyinka gudaha ka soo baxa, iyadoo maqaaxiyaha hawshaan qabtaana ay sii kordhayaan.
Maqaaxidda Gaafuun waxay ku taal bartamaha Hargeysa, waxayna aad mashquul ugu tahay iibinta cuntada haruurka iyo geleyda guddaha dalka ka soo baxda, Ibraahim Yuusuf Gaafuun waa mulkiilaha goobtaan wax laga cuno, wuxuu Ergo u sheegay.
“Waxaan iibin jiray baastada iyo bariiska dibadda laga keeno, anniguna waan cuni jiray, waxaan arkay inaysan nacfi badan lahayn, markaas ayaan go’aansaday inaan kariyo cuntadda gudaha sida Geleyda, haruurka, digirta laguna iidaamo caano iyo saliidda macasaradda”
Cuntadaan oo nacfi ahaan ka roon tan kale ee dibadda laga keeno ayaa haddana ay tahay mid ka qiimo jaban, waxaa la iibiya saxanka geleyda ama haruurka 3000 oo shillinka Somaliland ah, halka raashinka baastadda iyo bariiska laga keeno dibadda la iibiyo lacag ka badan 7 kun.
Gafun ayaa sheegay in dadku ay aad uga cabanayeen cuduro ay ka mid yihiin calool fadhi iyo baaba sir ayey dadku isla ogaadeen caafimaadka dheef shiid ee ay leedahay cuntada buushaha leh.
Dr. Siciid Sheikh Maxamed waa takhtar xilligaasna wuxuu ku sugnaa goobta wuxuuna Ergo u sheegay “Cuntadda dalka ka soo baxda way nacfi badan tahay cuntooyinka banaanka laga soo dhoofiyey, dadkuna weli si wanaagsan uma fahmin, cuntadda buushaha leh fibar ayaa ku jira xoojinaya qofka tamartiisa iyo lafihiisa.”
Dhaqan ahaan Soomaalida miyiga ku nool ayaa cunta haruurka buushaha leh xilliga qofku jabo, taasoo ay uga markhaati kaceen inay kobciso lafaha qofka, Dr. Siciid ayaa sheegay in cuntooyinkaan buushaha leh ay dadka ka caawiyaan calool fadhiga iyo tamar daradda, isagoona intaas ku daray in bulshadu cunto bur iyo bariis cad oo laga keeno wadamadda aasiya runtii nacfigooduna aad u liidato, cuntadaas oo qayb ka ah tan kordhisay xaddiga nafqa darrida ka dhex jirta bulshadda, wuxuuna kula taliyey dadka inay badsadaan isticmaalka cuntadda beeraha wadanka ka soo baxday si loola dagaalamo nafaqa daridda iyo cuduradda kale ee laga qaado cunto aan miisaanayn.
Cumar Serbiya
