Beeraleyda ku nool tuulooyinka kala ah Garaash, Hiiraan iyo Leebow oo 25 km dhanka waqooyin ka xiga magaalada Beledwayne ayaa sheegaya in wax soosaarka beerahooda sanadkan ay ragaadiyeen roob yari iyo cayayaan isbiirsaday.
Cumar Ibraahim Faarax oo ka mid ah beeraleyda tuulooyinkaas ayaa u sheegay Raadiayaha Ergo in wax soo saarka beerah uu hoos u dhacay kadib markii ay haleeleen cudurro ay ka mid tahay malabisada, cayayaanka sida diiratada, xajiinta, cawska loo yaqaan jaanka oo dhibaato u geysta balka, geed jinniga iyo roob yarida sanadkan.
Wuxuu intaa ku daray in cayaanka qaarkood ay keenaan in beertu qalasho halka qaarna ay galaan abuurka oo uu sidaasi ku baabo, beeraleey badan ayaa sanadkan aan helin dallag fiican waxayna ku tiirsan yihiin biyaha roobka oo kaliya.
Mukhtaar Xasan Cabdi ayaa Ergo u sheegay in haddii ay helaan qalab iyo dawooyin ay soosaari karaan dallag tayo fiican leh oo ku filan dadka deegaannadaas ku nool haddii kale xaaladduu ay sii xumaan karto.
Abuukar Daa’uud Guure waa gudoomiyaha tuulada Hiiraan wuxuuna u sheegay Ergo in tuulada Hiiraan oo kaliya ay ku nool yihiin in ka badan 500 oo qoys oo noolashoodu ku tiirsan tahay wax soo saarka beeraha haddii la waayana ay noolashu ku adkaan karto, wuxuu intaa raaciyey, “dadku cashar ayey ka barteen abaartii dhacaday 2011 oo hadda waxaa jira kaydad ay dhigteen laakiin maaha mid ku filan waayo xoolaha iyo dadkuba waxay u baahan yihiin cunno waxaana laga helaa waa beeraha,” ayuu yiri.
Beeraleeyda tuulooyinkan ayaa dabcada dallagyo ay ka mid tahay masagada.
Maxamed Cismaan Makaraan
