Ku dhawaad 200 oo arday oo ka soo jeeda qoysaska dan yarta ah ee ku sugan degmada Dhuusamareeb ee gobolka Galgaduud ayaa ka faa’ideystay dugsi hoose oo ay gacanta ku hayaan dhallinyaro iskood isku abaabulay.
Arwaax Cabdullaahi Siyaad wuxuu ka mid yahay dhallinyarada wax ku baratay gobolka waxna ka aasaasay dugsigan, mar uu la hadlay Raadiyaha Ergo wuxuu sheegay in barnaamijkan ay ugu talagaleen inay ka faa’ideystaan carruurta ka soo jeeda qoysaska aan awoodin lacagaha lagu dhigto iskuullada si carruurtu uga badbaadaan inay qaadaan wadooyin aan fiicnayn.
“Iskuulka ayaa hadda degan mid ka mid ah xarumihii hore ee iskuulladii dawladii dhexe oo aan dayac tirnay dhammaan macalmiinta iyo gacan ku ahynta waxaa iska kaashada ardayda dhigata dugsiyada sare iyo kuwa horay uga baxay, muddo laba sano ah ayaan wadaan hawshan,” ayuu yiri.
Nasro Nuur Maxmed waxay ka mid tahay 104 gabdho ah oo dhigta dugsigan bilaashka ah waxayna Erguosheegtay in ay heshay xilli ay aad ugu baahnayd waxbarshada waalidkeedna uusan awdoodin dhaqaalaha ku baxaya.
Amino Tahliil waa hooyo ay laba gabdhood u dhigtaan islkuulkan waxayna aad u soo dhawaysay arrintan ayadoo tilmaantay inay fursad u tahay carruurta iyo waalidka.
Iskuulkan waxaa la furay sanadkii 2013, goobaha waxbarasha a Soomaaliya ee iminka jira waxay u badan yihiin kuwo gaar loo leeyahay oo lagu dhigto lacago taasoo caqabad ku ah dadka barakacay iyo dan yarta.
Maxmuud Cabdi Diirshe
