Carruurta ku sugan tuulada Ceel-shiil oo degmada Ceelbuur ee gobolka Galgaduud u jirta 16 km dhanka waqooyi, ayaa lagu soo warramayaa inay soo ridanayaan cudurada kala ah jadeecada, shubanka iyo duumada sida uu idaacadda Ergo ugu warramayo Axmed Jimcaale oo ka mid ah dadka deegaanka oo wareysi siiyey weriyaha Radio Ergo ee magaalada Gurceel, wuxuuna waydiyey imisa carruur ah ayey cududradan soo riteen.
Axmed: Inta aan hadda ognahay 13 carruur ah oo qaarkood xaaladoodu liidata.
Ergo: Maxay yihiin cudurada ku dhacaya carruurta?
Axmed: Waa jadeeco, shuban biyood iyo duumada.
Ergo: Goormaa cuduradan lagu arkay Ceel-shiil?
Axmed: Bishaan iyo bishii ka horreeysay way jireen 3 cudur, dadkuna ma haystaan xarumo caafimaad iyo dawooyin lagula tacaalo toona, waxaa intaa sii dheer in dad badan oo ka soo qaxay colaadaha ka jira degmada Ceelbuur ay deegaanka yimaadeen oo aan waxba haysan, carruurta qaarkood waxay ka soo jeedaan qoysaska soo barakacay, colaadaha jira awgood hay’adaha samafalku ma soo gaaraan deegaannadan.
Ergo: Haddii aysan jirin xarun caafimaad yaa xaqiijiyey cuduradan?
Axmed: Qaar ka mid ah carruurta ayaa loo qaaday magaalooyinka waxaana laga daaweeyey cuduradan aan kuu sheegayo, midda kale jadaceda waa cudur soo laablaabta marka calamadihiisa waa yaqaaniin dadku, laakiin wax dhaqtar ah oo cadeeyey ma jiro.
Ergo: Carrruuta xanuunsan waa imso jir?
Axmed: Waa 6 jir iyo inta ka yar baa u badan, inkasto dad waawayn ay ku jiraan.
Ergo: Maxaa sababay cuduradan?
Axmed: Sida aad ogtahay dadkan waxay ka soo barakaceen coladadaha waxayna biyo ka cabbaan ceelal gacan ku qod ah oo aan biyo nafiid ah lahayn, kolley waxaan umalaynay inay biyahaas iyo adeegga caafimaad xumo ee ka jira meesha iany keeneen xanuunada.
Ergo: Bal ka warran dhanka cunnada?
Axmed: Deegaanka waxaa daashaday colaado ku soo noqo noqaday marka cunna fiican ma jirto dadku way iska dhibaataysan yihiin.
Maxamuud Cismaan Cabdulle
