Barakacayaasha ku nool kaamka Jowle 2 ee magaalada Garowe ayaa ka cabanaya musqulaha ay dadku wadaagaan ee kaamka ka dhisan oo qaab-dhismeedkoodu uu liito, taasoo sababtay inay dumaan qaarkood.
Musqulahan oo gaaraya ilaa 100 ayaa waxaa sanadkii hore dhisay hay`adda NRC, waxayna ka dhexeeyaan 500 oo qoys oo kaamkaas ku nool.
Xaawo Xumow Madoobe oo ah hooyo haysata afar icarruur ah, isla markaasna umul ahayd ayaa waxaa toddobaadkii hore la duntay musqul ay isticmaaleysay, muddo 20 daqiiqo ah markii ay ku jirtay godka ayaa waxaa soo badbaadiyay dadka deriska oo ka warhelay.
Xaawo oo Ergo la hadleysay ayaa sheegtay “Suuliga markii horeba waan ogeyn inuu jajabsanaa, odayaasha kaamka ayaa nooga digay inaan la gelin, laakiin waan iska isticmaaleynay oo meel kaloo aan aadno malaha, markaan rabo inaan kasoo baxo ayay ila go`day, sinta iyo dhabarka ayaa dhaawac iga soo gaaray hadda.” Ayay tiri Xaawo.
Cismaan Abuukar Sheekh oo horjooge u ah Kaamka isla markaasna ka mid ah ragga wax dhisa ee Garoowe, ayaa sheegay in sababta ay musquluhu u dumayaan ay tahay dhismahooda oo aan hagaagsaneyn.
“Musqulahan intaan la dhisin ayaan ka hadalnay in qaabka loo qorsheeyay aysan wanaagsaneyn, sababtoo ah shubkoodaba waa 4 senti,waxaa naloo sheegay in la hagaajin doono, laakiin waxba lagama qaban.” Ayuu yiri Cismaan.
Daahir Rooble oo ah odayga Xaawo, kana mid ah odayaasha kaamka ayaa ka codsanaya hay`adaha gargaarka inay ka caawiyaan dayactirka musqulahaas.
Barakacayaasha ayaa haatan bannaanka duurka ah iska fadhiista, qaarkoodna kaamamka kale ayay u doontaan musqul.
Cabdiraxmaan Maxamed Xaaji/FM
