Wasiiru Dowlaha wasaaradda arrimaha Soomaaliya Burci Mohamed Hamza ayaa sheegay inay qorshaynayaan in deegaannada dhawaan la xorreeyey in la dajin doono qaxootiga doonaya in ay ka soo laabtaan dalka Kenya, wasiirka oo wareysi siiyey Radiyaha Ergo ayaa sidoo kale sheegay in aan cidna lagu qasbin doonin inay ku soo noqoto Soomaaliya gaar ahaan qaxootiga, Burci ayaa sidoo kale sheegay in uu shir looga hadalyey arrimaha qaxootiga oo ka dhacay magaalada Geneva uu ka qabygalay, Weriyaha Radio Ergo Cabduqaadir Maxamed Cabdulle ayaa ugu horreyn waydiiyey wasiirka halka ay marayaan arrimaha qaxootiga iyo dib u soo celintooda.
Burci: anigu waxaan ka qayb galay shir lagu qabtay Geneva oo looga hadlayey arrimaha qaxootiga, waxaan la kulmay wasiirka arrimaha gudaha Kenya waxaan ku heshiinay in aysan jirin cid si xoog ah lagu soo celiyo, waana isku raacnay, balse haddii Soomaalida Kenya jooga ay doorbidaan inay ku soo noqdaan dalkooda waa loo ogalyahay, waxaa kale oo dadka shirka ka soo qaybgalay ee daneeya arrimaha qaxiitiga aan u sheegnay in meelaha la xorreeyey dib loo dhiso oo loo sameeyo iskuulo, caafimaad iyo waxyaabaha kalr ee daruuriga ah si ay dadku ugu soo noqdaan oo ay noolal u helaan, wayna ballan qaadeen in la sameeyo iskuullo, cisbitaallo iyo warshado si shaqo loo abuuro oo ay goobahaas u noqodaan bay’ad ay dadku ku noolaan karaan.
Ergo : go’aanka Kenya maxaa iska badalay wasiirka arrimaha gudaha muxuu kuu sheegay?
Burci: Wuxuu noo sheegay in mar danbe aysan dhici doonin in ay cid qasab ku celiyaan sidii horay u dhacday oo kale, arrintan waxaa sidoo kale ay Kenya ku ballan qaaday shirki ka dhacay Adis-aba ee arrimaha qaxootiga looga hadlayey.
Ergo: Madaxda UNHCR maxaad kala hadasheen? xagay bayse UNHCR ka taagantahay arrimaha qaxootiga? Ma waxay rabtaa inay dadka meesha ku hayso? Mise waxay rabtaa inay dadka soo celiso ayadoo kaashanaysa labada dowladood Soomaaliya iyo Kenya.
Burco: UNHCR waxay nala qabtaa in dib loo dhiso goobaha laga saaray Al-shabaab oo adeegyo loo sameeyo, tusaale ahaan beeraleeyda oo kale waxay soo noqon karaan marka loo abuuro beeraha oo la caawiyo waa run Al-shaab waa laga saaray deegaanno badan laakiin maxaa xiga oo laa baahanyahay waa in la dhisaa.
Ergo: Waxaad dhawaan tagtay Baraawe maxaad ku soo aragtay?
Burci: Dadka degmadaas dega waa beeraleey iyo kalluumaysato, waxaan ku soo arkay dad diyaar u ah inay helaan maalgalin oo magaalada laga sameeyo goobo loo dalxiiso, maadaamada Baraawe ay ku taallo xeeb qurux badan oo ku wacan dalxiiska ganacsatada waa inay sameeyaan maalgashi.
Ergo: Dowladdu waxay ballan qaaday in gargaar la gaarsiin doono maxaa ka hirgalay ?
Burci: Dadku mahan inay sugaan oo kaliya in dowladu gargaar gaarsiiso balse waxaa loo baahanyahay in ay wax qabsadaan oo ay hindise keenaan.
Cabduqaadir Maxamed Cabdulle
