Dilaalayda xoolaha ku iibisa sayladda Gaalkacyo ayaa sheegaya in abaarta oo keentay daaq xumi ay ka dhigtay xoolaha kuwa waydoobay, tanoo ka dhigtay qiimaha xoolaha mid aad u hooseeya, sidoo kale tiradii xoolaha la iibsan jiray oo ahayd 300 oo neef maalintii ayaa hadda aad uga yaraatay oo waxaa sayladda lagu iibsadaa wax ka yar 100 neef.
Cabdi Ciise Sahal oo ka mid ah ganacsatada xoolaha ku iibisa sayladda ayaa Ergo u sheegay in duruufta abaarta ee jirta aad ka garanayso wejiyada dadka xoolaha keenaya iyo dhogorta xoolaha, xoolaha ku sugan sayladduna waa badan yihiin mase laha wax tayo, saddex maalmood ayaa weli xoolihii joogaan, dadka xoolo dhaqatada ah ayaana door biday inay iska iibiyaan xoolaha jilicsan.
Horay neefka ariga ah waxaa la kala siisanayey 2 milyan oo shillin Somaali ah haddase waxaa la siisanayaa 1 milyan iyo wax ka sii yar.
Maryan Siciid oo ah haweenka hillibka ka ganacsada kuna sugan sayladda ayaa sheegtay in ay iyadoo faramaran ka noqoto sayladda markay wayday xoolo macaasho leh,Weriyaha Ergo ee Gaalkacayo ayaa sheegay inay u sheegayaan ganacsatada iyo xoolo dhaqataduba in xoolaha sayladda joogaa ay tiro badan yihiin taasina ay keentay xoolo dhaqatada oo ka cabsi qaba inay ku haraan xooluhu abaarta jirta.
Maxamed Soomaali/FO
