Bishii labaad waxaa xiran MCH-ka tuulada Sinu-jiif oo 60km dhinaca waqooyi bari ka xigta magaladda Garoowe, xaruntaan ayaa adeegyada caafimaadka aasaasiga ah u qaban jirtay dadka tuulooyinka iyo reer miyiga deggan dooxada Nugaal. Wuxuuna bixin jiray adeegyada hooyada iyo dhallaanka iyo tallaalka isagoona kaafin jiray baahida caafimaad ee guud ahaan bulshada tuulada.
MCH-kani oo ka koobnaa 9 qol ayaa gubtay, waxaase la badbaadiyey labada qol ee dhalmada hooyada. Tallaagad kuwa gaaska ah oo tiilay qaybta tallaalka oo qaraxday ayaana sababtay gubashada xaruuntan, qaybaha kaydka daawada, baarista carruurta iyo miisaanka, qaybta baaritaanka caadiga ah iyo qaybta tallaalka oo ahaa kuwa ugu muhiimsan ayaana dabku baabi’iyey.
Fardowso Cismaan oo madax u ah qaybta tallaalka ee MCHka ayaa Ergo u sheegtay inaan wax tallaal ah la siin carrruurta deegaanka iyo miyiga ka ag dhow muddadaan labada bilood ah.
MCHkaan waxaa daaweyn iyo tallaal ka qaadan jiray 600 oo qof bishiiba, bishii ugu dambaysay waxaa labada qol ee shaqeeya ku dhashay 20 carruur ah, waxaana jira kuwo loo qaaday Garoowe si ay u helaan daaweyn hagaagsan.
Cabdiraxman Maxamed/FO
