Qaar ka mid ah beeralleyda magaalada Jowhar ee beerahooda ku waraabta kanaalka Moyko ayaa haatan bilaabay hagaajinta kanalladooda iyo u diyaargarowga xilliga dayrta.
Cabdulqaadir Saalax oo ah guddoomiyaha kanaalka Moyko ayaa Ergo u sharraxay sida howsha kanaalka ay u socoto, “Kiliga hadda kahor ayuu naga duugmay oo daadadkii ayaa saameyn ku yeeshay, wax naga caawiya ma arkin, beeralleyda ayaa iska kaashatay oo hadda qodeysa, ciidda ka saareysa si loogu waraabiyo beeraha xilliga dayrta aan u diyaar garoobeyno”
Kanaalka Moyko oo ay wadaagaan ilaa 500 beeralley ah ayaa wuxuu waraabinayaa 98 hiktar oo dhul beero ah, waxaana dayactirka kanaalka wada beeralley haween iyo rag isugu jira oo iskaashaday.
Madiino Aadan Cabdullaahi oo ka mid ah beeralleydaas qodidda kanaalka waday ayaa sheegtay inay u diyaar garoobeyso nadiifinta qaybta kanaalka kaga aaddan, si ay ugu waraabsato beerteeda oo ah meesha keliya ee dakhliga uu kasoo galo.
“Dayrta ayaan u diyaar garoobeynaa, xooggeenna ayaan ku hagaajineynaa qaybta nooga aaddan kannaalka, carruurta ayaan ku korsadaa beerta.” Ayay tiri Madiino.
Bishan dhexdeeda ayaa fatahaad uu webigu ka gaystay tuulada Jameeco ee magaalada Jowhar waxaa ku baaba`ay dhulbeereed gaaraya ilaa 25hiktar oo ay ku beernaayeen digir iyo galley.
Jaamac Xaddi oo ka mid ah beeralleyda tuulada Jameeco ee magaalada Jowhar ayaa sheegay in 25hiktar oo dhul beereed ay ku beernaayeen digir iyo galley ay cagta mariyeen biyaha webiga kasoo fatahay.
“Haddaan nahay beeralleyda Jameeco, khasaaro weyn ayaa naga soo gaartay oo dalagyadii inoo beernaa waxba nooma harin, waa arrin aan ka naxnay.” Ayuu yiri Jaamac.
Beeralleyda Jowhar oo ku tiirsan biyaha webiga oo ay beertooda ku waraabsadaan ayaa dhowr jeer oo hore ay saameyn ballaaran ku yeesheen fatahaado uu sababay webiga Shabeelle, beeraha qaar ayaa waxaa gooyay fatahaadda.
Maryan Sheekh Cabdi/FM
