Hey’adda Masiibooyinka Qaranka ayaa ka digeysa abaar hor leh oo halis gelin karta nolosha kumanaan Soomaali ah oo ku nool shan gobol oo ku yaal koofurta dalka. Maxamuud Sheekh Xasan, Madaxa Kormeerka iyo Qiimeynta ee Hey’adda, ayaa sheegay in cunto iyo biyo yari baahsan ay heysto bulshooyinka ku nool gobollada Gedo, Bakool, Shabeelada Hoose, Hiiraan iyo Galgaduud.
Dadka reer guuraaga ah oo aan helin roob fiican iyo daaq ku filan sanadihii dhawaa ayey halista ugu daran heystaa, sida uu sheegay Maxamuud. Balliyada iyo barkadaha biyaha ee dhulka miyiga ah ku yaal ayaa guray, taas oo dadka xoolo-dhaqatada ah ku qasabtay inay u guuraan magaalooyinka biyaha laga heli karo.
Xoolo-dhaqatada oo keliya ma ahan, balse dadka beeraleyda ah ee ku nool gobollada Bakool, Shabeelada Hoose iyo Hiiraan ayaa iyana bilaabay inay barakacaan tacabka beeraha oo aad hoos ugu dhacay awgeed. “Xaalku wuu sii xumaan karaa haddii aan si deg deg ah gargaar loola gaarin bulshooyinkaas,” ayuu yiri Madaxa Kormeerka iyo Qiimeynta ee Hey’adda Maxamuud Sheekh Xasan oo la hadlay weriye Ergo ka tirsan.
Colaadaha meelaha qaar ka jira iyo go’doominta Shabaab kusoo rogtay degmooyin ka tirsan Gedo, Bakool iyo Hiiraan ayaa sii xumeynaya xaalka bulshooyinka baahan ee gobolladda ku nool. “Hey’adda gargaarka waa iney si deg deg ah u qaadaan tallaabooyin looga fogaado dib usoo noqoshada abaartii 2011-2012,” ayuu yiri Maxamuud.
Nuur Cali/FO
