Qaar ka mid ah qoysas ka soo noqodey xerayaha qaxootiga Dhadhaab ee gobolka Waqooyi-Bari Kenya, ayaa ka sheekeeyey dhibaadatii ku kalliftay inay soo noqdaan oo ay ku biiraan dadka barakacay ee magaalada Baydhabo.

Isaaq Aadan Maxamed ,oo u warramay Ergo ayaa yiri,waxaan ku soo baxaney 24 qoys oo hadda qaarkood ay jiraan baadiyaha,Sababtaan uga nimaadnay qaxootiga waxay ahayd markii horaba annaga beera-heenna ayaan gadannay oo aan ku aadnay qaxootiga si aan halkaas nolol fiican uga helno, laakiin ma suurto gelin oo nolol xumo iyo amaan darro ayaa halkaas nagu qabsatay, marka deegaankeenna ayaan kusoo laabannay oo aan ogaannay wax noo dhaama inaysan lahayn.

Waxaan gaari ka soo raacnay Dhagaxley,markaan mareyno meel la yiraahdo Naasiriyo oo Jubbada Dhexe ka tirsan ayaa burcad na qabsatay  oo dhac iyo kufsi loo geystay dadka gaariga saarnaa, nafteenna ayaan halkan la nimid,Xeradan oo la yiraahdo 11 Jannaayo ayaan kusoo degnay, dadka ayaa noo qaaraamay, nolol fiican ma jirto kolley,markii hore beeraheenna ayaan gadannay hadda ma haysanno sidaasi waxaa Ergo u sheegay Isaaq.

Sowda Macallin oo ah hooyo 5 carruur leh waxay muddo 3 sano ah ku nooleyd xerada Ifo. Nolol xumo ayaan uga soo tegay Ifo, haddaad doonto inaad qoryo duurka kasoo gurato kufsi ayaa haweenka loo geystaa,gobolka Baay ayaa ka mid ah gobollada ay sida aadka ah u saameeyeen abaaraha iyo colaadaha isbiiradsaday ee ka jira qaybo ka mid ah dalka.

Muxiyaddiin Xusni/FO