Deegaanka Gerilley oo ka tirsan gobolka Gedo kuna taalla xadka Soomaaliya iyo Kenya, ayaa laga soo sheegayaa inay ka jirto biyo la`aan aad u daran oo sababtay in dadku ay ka guuraan, kuwaasoo beegsanaya deegaanno kale oo ka tirsan gobollada Jubbada Hoose,Gedo iyo waddanka Kenya.
Aar Maxamed Maxamuud oo ah guddoomiyaha deegaanka Gerilley oo u warramay raadiyow Ergo, ayaa sheegay in xaaladda biyo la`aaneed ay mareyso meel halis ah oo biyaha hadda laga cabo deegaanka ay booyado ka soo dhaamiyaan magaalada Wajeer ee gobolka Waqooyi Bari Kenya Kenya oo 120 KM u jirta Gerilley,f uustada biyaha qiimaheeduna waa 140 kun oo shilin Soomaali ah halka ay horay u ahayd 50 kun.
“Deegaanka Gerilley malaha ceel biyood waxaa laga cabaa waa baraago iyo waro xilli ay roobaadka biyo galaan,waxaan soo marnay saddex sano oo abaar kulul ah, hadda dhulku baad iyo biyo midna malahan noloshu way adag tahay, xaaladda biyo la`aaneed ee sii xumaanaysa iyo qiimaha biyaha oo sii kordhaya ayaa sababtay in qoysaska xoolo dhaqatada ah iyo danyartu ay u guuraan deegaanno kale si ay biyo u helaan.” ayuu yiri Aar.
Koofurta iyo bartamaha Soomaaliya ayaa waxaa xilligan ka jira abaaro iyo biyo la`aan saamayn ku yeelatay dadka reer guuraaga ah iyo beeralleeyda.
Axmed Cumar/FO
