Ehellada toddobo carruur ah oo ku dhaawacantay firirka qaraxii Sabtidii ka dhacay xarunta baarlamaanka ayaa dowladda weydiisanaya inay ka taageerto lacagta daweynta ubadkooda. Carruurta ayaa ku dhaawacmay gudaha xerada dadka deegaannadooda kasoo barakacay Darwiish oo ku dhow xarunta baarlamaanka.
Carruurta ayaa hadda lagu daweynayaa isbitaalka Daaru-shifa oo ah xarun caafimaad oo si gaar ah loo leeyahay. Cali Cabdi Raage oo la mid ah carruurta dhaawacantay dhalay ayaa raadiyoow Ergo u sheegay in dadka soo barakacay ay horey dhib u qabeen sidii ay ubadkooda cunto ugu heli-lahaayeen, laakiin hadda daaweynta carruurta dhaawacantay ay tahay culeys kale oo soo kordhay.
Faadumo Cusmaan oo wiilkeeda dhaawac caloosha ah uu kasoo gaaray firirika qaraxaas ayaa weriye Ergo ka tirsan u sheegtay inay ka welwelsan tahay halka ay ka heli doonto dhaqaale ay ku bixiso lacagta isbitaalka.
Ehellada toddobada carruurta ah ee dhaawacmay waxey dowladda ka codsadeen in ay ka caawiso lacagta daawooyinka ee isbitaalka uu ka rabo.
