Daawo yaraan ka jirta gobollada dalka qaarkood, iyo hay`adihii samafalka ee taakuleyn jiray isbitaalladaas oo meesha ka baxay sida hay`adda takhaatiirta aan xuduudda lahayn ee MSF ayaa sababtay in carruur badan oo nafaqo darro ay hayso lasoo gaarsiiyo magaalada Muqdisho, si loo daweeyo.
Carruur laga kala keenay goballada Mudug, Hiiraan, Shabeellada dhexe iyo Shabeellada Hoose ayaa haatan lagu daweynayaa isbitaalka hooyada iyo dhallaanka Banaadir, kuwaasoo ay ka muuqato nafaqo darro aad u sarreysa.
Xaliimo Xasan oo ah hooyo haysata lix carruur ah kana timid miyiga degmada Xarardheere ee gobolka Mudug isla markaana gabadheeda oo 1sano jir ah keentay isbitaalka, ayaa Ergo u sheegtay “Sababta keentay in aan Mudug ilaa Muqdisho soo qaado ilmahayga yar waa dawo yaraan ka jirta deegaanka, xanuunka gabadheyda hayana waxaa la iigu sheegay nafaqo darro halkaan ayaana lagu quudiyaa.” ayay tiri Xaliimo Xasan.
Carruurta isbitaalka ku jirta ayaa lagu quudiyaa caano iyo buskut nafaqeysan, si ay usoo kabssadaan. Xabiibo Cumar oo iyadana gabar 4 bilood jirta oo ay ayeeyo u tahay ka keentay baadiyaha deegaanka Tooratoorow ee gobalka Shabeellaha Hoose ayaa sheegtay in gabadheeda ay dhalatay xilli deegaanku ay ka jirto abaar oo caanihii xoolaha ee carruurta lagu quudin jirayna aysan haysan, ayna muddo kadib ku aragtay xanuunno ay garan weysay waxa ya yihiin. “Qandho iyo barar ayaan ku arkay markii hore, markaan halkan keenayna waxaa lagu shubay dhiig, hadda quudin iyo daweyn kale ayaa u socota aad bayna u roon tahay, xanuunkeedana waxaa la iigu sheegay nafaqo darro”
Cabdi Xasan oo wiil 5 sano jir ah magaalada Beledweyne kasoo qaaday oo lagu quudinayaa isbitaalka Banaadir, ayaa sheegay in wiilka yar ay weynaatay caloosha, uuna ku arkay qandho daran, “lix bilood ka hor ayuu xanuunkan qabtay wiilkeyga ma garanayn wuxuu yahay, laakiin markaan Muqdisho keenay ayaa la ii sheegay in wiilkeyga ay hayso nafaqo darro, hadda waa la quudiyaa waxaana dareemayaa in calooshiisa ay wax iska beddeleen.” Ayuu yiri Xasan Cabdi.
Isbitaalka hooyada iyo dhallaanka Banaadir ayaa quudin lacag la`aan ah u sameeya carruurta ay hayso nafaqo darrada ee laga keeno gudaha magaalada Muqdisho iyo gobollada dalka qaarkood.
Dr. Faa`isa Maxamed Yuusuf oo ka mid ah dhaqaatiirta qaybta quudinta carruurta ee isbitaalka Banaadir ayaa Ergo u sheegtay in saddexdii bilood ee ugu dambeeyay ay kordheen carruurta nafaqo-darreysan ee isbitaalka lasoo gaarsiinayo. “Saddexdii bilood ee sanadka ugu horreysay hal ilaa saddex kiis ayaan qaban jirnay, balse hadda ilaa toban bay gaarayaan, waxaana laga kala keenaa bannaanka Muqdisho, iyo gobollada dalka oo ay ugu badan yihii Shabeellaha Hoose iyo Shabeellaha Dhexe.
Xamdi Cabdullaahi Xasan/FM
