Ugu yaraan sideed carruur ayaa nafaqo-darro ugu geeriyootay xero dad deegaanadooda kasoo barakacay ay ku nool yihiin oo ku taal duleedka magaalada Muqdisho.Weriyaha raadiyoow Ergo ee magaalada Muqdisho Xamdi Cabdulaahi waxey sheegtay in xeryaha kale ee isla deegaankaas ku yaal ay iyana carruur ugu geeriyoodeen nafaqo-darrida balse tiro koob rasmi ah laga ma helin.
Haddaba, Xamdi waxey wareystay labo ka mid ah haweenka carruurtoodu ay nafaqo-darridu u geeriyoodeen. Haweenkaas waxaa ka mid ah Jiijo Jamaal Sheekh Cumar oo qoyskeeda oo beeroley ah ay kasoo barakaceen dagaalka Qoryooley ku dhexmaray beelo hubeysan. Labo ka mid ah carruurteeda ayaa macluul ugu geeriyootay xero ku taal deegaanka Ceelasha Biyaha ee duleedka Muqdisho.
Jiijo: Ilmaha waa iga rafaadeen dhibaato weyn ayaa na haysato nafaqo darro ayay ilmahaygii iiga dhinteen
Ergo: Imisa carruur ah ayaa kaa dhimatay?
Jiijo: Wiil afar jir ah iyo gabar saddex sanno jirta ayaa iga dhimatay meeshaan intaan joogay, dhibaatooyin badan oo isgu jira baahi, oon iyo musqul la’aan ayaa na haysato
Ergo: Intaysan ilmuhu kaa dhiman ma geysay dhakhtar?
Jiijo:Maya, meel aan geeyo oo aan dawo uga raadiyo waan garan waayay
Ergo: Ilmahaagu ma nafaqo darri ayay u dhinteen mise xanuunno kale?
Jiijo: Baahi iyo nafaqo darri ayay u dhinteen, habeenkii wax la siiyo ma leh, magaalada haddaan galo wax aan soo helayo ma jirto , dhar-dhaqoow haddaan u baxo 20 kun oo sh/so ah ama 30.sh/so ah ka badan ma soo helayo, waxay goynaysana ma leh, dhibaatadaas ayaa jirta waa iska baaba’ayaan ilmuhu.
Ergo: Intaysan kaa dhiman carruurtu maxaad siin jirtay?
Jiijo: Haddaan helo Soor iyo Caano garoor ayaan siin jiray, haddaan waayana Mooska cagaarka, Yaanyo iyo Bocor ayaan u Karin jiray markaan beeraheenna joognay, haddaan waayana waan iska seexin jiray, hadda waan soomanahay wax aan ku afuro ma haysto waxaan ilmaha u kariyana ma jiraan dhibaatadaas ayaa inna haysato.
Xabiibo Cali waa hooyo ku nool xerada Sarkuusta ee duleedka magaalada Muqdisho oo dhowr carruur ah nafaqo-darro ugu geeriyoodeen.
Ergo:Tirada carruurta ee k u dhimatay kaamka aad ku nooshahay ee nafaqo darida sababsaday waa imisa?
Xabiibo: Carruurta halkaan ku dhimatay ee nafaqadarridu haleeshay siddeed carruur ah wey ka badan yihiin.
Ergo: Imisa carruur ah ee aad adigu dhashay ayaa dhimatay?
Xabiibo: Saddex carruur ah ayaa nafaqodarri iiga dhimatay Shacbaankii la soo dhaafay, siday u joogeen ayay barareen, meelaha farmashiyeyaasha ayaan geeyay ka dibna waa iska dhinteen.
Ergo:Yaa xaqiijiyay inay seddexdaada ilmoodba ay nafaqo darri u dhinteen?
Xabiibo: Dariskeyga oo dhan ayaa arkayay in ilmahayga waxa ku dhacay ay nafaqodarri ahayd una geeriyoodeen.
Ergo: Maxaa siin jirtay ilamahaaga intaysan dhiman?
Xabiibo: Bariiska ama baastada haddaan helo ayaan siin jiray wax aan u kala sooci jiray ma leh, caano uma awoodo, tabartayda ayaaba sidaas ah, nafaqada la sheegayana maba awoodno waligeyna caano ma siin.
Ergo: Saddexdaada carruurta ah ee dhimatay ma isku mar ayay geeriyoodeen?
Xabiibo: Labo ka mid ah laba maalin oo isku xigtay ayay geeriyoodeen midna muddo yar ayuu ka dambeeyay.
Ergo:Muddo intee la`eg ayay xanuunsanaayeen ilmahaagii dhintay?
Xabiibo: In muddo ah ayay iga xanuunsanaayeen, waan la dhibtooday, waan la murugooday ka dibna waa iga saqiireen Ilaahay ayaa sidaas u qaddaray.
Ergo:Maxay kala ahaayen ilmaha kaa dhintay?
Xabiibo: Laba wiil iyo gabar ayay ahaayeen.
Ergo: Yaa ku caawiyay markii ilmuhu kaa dhinteen?
Xabiibo: Dariskeygu waa ii soo tacsiyeeyeen laakiin cidkale oo ii soo gurmatay ma jirto, kaamkaanna laba soon ayaan degganahay cid waligey i caawisay oo hay’ad ama cid kale oo aan caawimaad ka helayna ma jirto.
