Photo | Qaar kamid ah dhlinayradda miisleyda /Sawir/Muxiyadiin/Ergo Hawl gallo ammaanka lagu sugayo oo ka socday Baydhabo maalmihii la soo dhaafay, ayey saraakiisha booliisku ku sheegeen inay 50 dhallinyaro ah kusoo qabteen intii hawl galku socday, kuwaasoo ay ku eedaynayaan denbiyo kala geddisan, ganacsatada yar yar ee degmada ayaase iyagu ku eedaynaya booliiska in la bar tilmaameedsanayo, dhallinyarada la xirayna iyaga u badan yihiin.
Isxaaq Cabdi oo ah 21 jir, kana mid ganacsatada waratada ah oo ciidamada intay qabteen soo daayeen kadib markii sida uu sheegay laga qaadey lacag baad ah, wuxuuna Isxaaq is weydiiyey sababta mar kasta loo bartilmaameedsado dhallinyarada ganacsiga yar yar ku leh suuqa magaalada Baydhabo, wuxuuna hadalkiisa intaas raaciyey in ay usii dheer tahay qab qabashada jir dil ay u geystaan ciidamada howlgalka fulinaya.
“Mar kasta haddii ciidamada howlgal ay ka sameyaan magaalada annaga ayay si toos ah noogu yimaadaan, ma ogin ujeeddadaas, wax dhibaato ah oo aan dadka ku heyno ma jirto, waxaa kaga daran marka lagu xiro lacag 10-doolar ah ayey kaa qaadayaan dembiga aad gasheyna kuuma sheegayaan, marka shaqada inaan iska joojinno ayaa naga soo dhow”.
Maxamed Sheikh Xasan waa 25 jir, wuxuu Ergo u sheegay in muddo saddex maalmood ah uusan shaqo qaban, isaga oo ka baqaya iney qabtaan ciidamada booliiska, taasna uu sheegay iney saameyn dhanka nolosha ah ay ku yeelatey maaddaama reerkiisa nolol maalmeedkooda uu uga raadin jirey gaari gacanka uu alaabaha bagaashka ku wareejin jirey.
Taliyaha qeybta booliiska gobolka Bay Mahad Cabdiraxmaan Aadan ayaase isagu Ergo u sheegay in eedayntaasi ay tahay mid aan sal lahayn, “Anagga ganacsato ma qab qabanno, laakiin waxaan qabqabannaa kuwa waddada xiraya, waana kuwa waratada ah, marka waxbaa usoo sheegnaa marka aan xirno marka waa been in ganacsato aan xir xirney, isagoo sheegay inaysan jirin haba yaraatee lacag laaluush ah oo dadka la xiro laga qaado”
Muxudiin Xusni
