Wasaaradda kalluumaysiga oo gacan ka helaysa hay’adda cuntada iyo beeraha qaramada midoobay ee FAO ayaa waday hawlo ay kaadhadh aqoonsi ku siinayaan kalluumaysatada Puntland.Muuse Cabdalla Ciise oo ka mid ah kalluumaysatada gobolka Bari ayaa Ergo u sheegay in kaadhadhkani wax wayn ay ka tarayaan shaqadooda “Waagii hore budhcad badeed ayaa markasta naloo malaynayey, hadda ID kaadh ayaan samaysannay, dhibaatadaasna way naga yaraatay, xalay oo ugu dambaysay anigoo badweynta ku jira ayaa markab dagaal na helay, markaan tusnay kaadhkeeniina waa na sii daayeen, kaadhkaanna wuxuu naga caawiyey inaan badda meeshaan doonno ka tagno kana soo kalluumaysanno, maraakiibta dagaalka ee la dagaallanta burcad badeedda ayaanan markii hore uga baqaynay, mana aanan dhaafi jirin xeebaha”
Cabdi Ismaciil oo markaas qoorta ku sitay kaadhkiisa, isagoo ku sugan xeebta Boosaaso ayaa isaguna Ergo u sheegay “Runtii kaadhkaani wuxuu naga caawiyey inuu qeexo waxaan nahay, inaan nahay dad xoogsato ah, muddo hadda bil ka hor ayaan helnay, runtiina waan ku nasannay, horay waxaa iigu dhacday waqtiyo badan in la igu qabtay badda gudaheeda iyadoo budhcad badeed la ii malaynayo, saacado badan oo la i haystayna ay keentay inuu xitaa kalluunkii aan soo jilaabtay qudhmo oo aan badda ku qubo”
Cabdinuur Cilmi Maxamuud Biindhe oo ah wasiirka kalluumaysiga ee Puntland ayaa isaguna Ergo u sheegay in aqoonsigaan ay waqti badan geliyeen, sidii ay u soo saari lahaayeen, ayna gaarsiin doonaan dhammaan gobollada Puntland kalluumaysatadeeda, iyagoona gacan ka helaya hay’adda cuntada iyo beeraha qaramada midoobay ee FAO, tanina waxay xaq siinaysaa kalluumaysatada deegaanka, ayna sahlayso in lakala saaro budhcad badeeddii iyo kalluumaysatadii ajaanibta ahayd ee badaha sida sharci darrada ah ku kalluumaysanayey.
Wasiirka ayaa sheegay inay waqtigaan xeebaha Puntland ay ka diwaan geliyeen 4 kun oo kalluumaysato ah, ayna bilaabeen qaybinta kaadhadhka dhammaadka bishii Maarso ee ina dhaaftay, waxayna u diyaariyeen dhammaan kaadhadh kalluumaysatada, hadda gobolka Bari keliya ayaa kalluumaysatooda la gaarsiiyey kaadhadhka, gobollada kalena hadda qaar loo diray kuwa kalena waa loo diri doonaa, ugu dambayna bishaan Abriil qofkastoo kalluumaysi ah oo Puntland ku sugan wuu haystaa kaadhkaan aqoonsi, wasiirka ayaa sheegay xeebaha ay gaadhsiinayaan kaadhadhka ay yihiin iskaashatooyinka kalluumaysatada ee ku kala sugan, Laasqoray, Boosaaso, Qandala, Caluula, Baargaal, Xaafuun, Bayla, Eyl iyo Garacad oo dhammaantood ah goobaha shaqada kalluumaysiga ah ee ugu muhiimsani ka socdaan, ayna yaalliin qaboojiyayaal.
Kalluumaysatada ayaa dhinaca kale codsaday qalabyo dheeri ah oo dhinaca kalluumaysiga ah maaddaama ay hadda ku dhiirran karaan hawlaha kalluumaysi oo tan iyo intii budhcad badeeddu kacday ahaa kuwo curyaamay baqdin ay ka qabaan in lagu khaldo budhcadbadeeddaas.
Khadra Maxamed Xasan/MH
