Kumanaan qoysas ah oo weli ku harsan degmada Xudur ee gobolka Bakool ayaa waxaa heysta cuno-yaraan baahsan kadib markii ganacsatada ay hantidoodii kala qaxeen magaalada.
Ambiyo Axmed Xasan, oo ah hooyo kontan sanno jir ah iyo leh shan carruur ah ayaa sheegtay in Shabaabku ku amreen ganacsatada in ay hantidooda kala baxaan magaalada kahor inta aysan ciidamada dowladda aysan la wareegin Xudur.
“Ganacsatada hantidoodii oo dhan waxa ay kala qaxeen magaalada, cunto dadka ku filana hadda magaalada lagama heli karo,” ayey tiri hooyo Ambiyo oo telfoon kula hadashay weriyaha Ergo ee magaalada Baydhabo.
Qoyska Ambiyo waxa ay ka mid yihiin dad kooban oo magaalada ku haray oo ay dib uga soo biireen qoysas kasoo noqday degmada Ceelbarde oo askarta dowladda dabo-socday. Qoysaskaas Ceel-barde kasoo noqday ayaa horey uga qaxay Xudur kadib markii Shabaab ay la wareegeen degmadi sanadii hore.
Gudoomiyaha degmada Xudur ayaa Ergo u sheegay in kooxda Shabaab ay xireen waddooyinka soo gala degmada oo ay gaadiidkana u diidan yihiin inay u gudbaan Xudur. Taas waxa ay halis ku tahay nolosha qoysas dhan afar kun oo weli degmada Xudur ku sugan.
Qiimaha cuntada yar ee suuqa degmada Xudur laga heli kara aad ayey sare ugu kacday oo jawaanka sonkorta ah oo horey loo iibin jiray lix boqol oo kun oo shilin hadda wuxuu marayaa hal milyan iyo boqol oo shilin sida uu sheegay Maxamed Xasan Cabdiraxmaan oo ka mid ah dadka degmada weli ku harsan. Jawaanka burka iyo bariiska oo iyana horey loo iibin jiray lib boqol oo kun hadda waxa ay marayaan sagaal boqol oo kun oo shilin.
Muxudiin Xasan/AM
