Boqollaal qoys reer guuraa ah oo ku nool tuulooyin ka tirsan degmooyinka Ceelwaaq iyo Baardheere ee gobolka Gedo ayaa harraad daran heysta xilli jiilaalka uu bilow uun yahay. Weriyaha Ergo ee gobolka wuxuu sheegayaa in ceelashii biyaha iyo warahaba ay gureen maaddaama biyo badan aysan gelin xilligii deyrta oo uu roobku aad u yaraa.
Tuulooyinka Takar,Faafax-dhuun, Gerilley, Garsaal, Warxool, Dibiriq, Dheenle, Burcalaan,Dhaso iyo War Gaduudo ayaa harraadka ugu daran laga soo sheegayaa. Dadka reer guuraaga ah ee tuulooyinkaas ku noolna waxay hadda ku nool yihiin biyo laga soo dhaamiyo dhul ka fog 60km oo iib ah.
Laakiin biyaha iibka ah qof walba ma gadan karo maaddaama fuustada biyaha hadda la iibiyo 100,000 oo shilinka soomaaliga ah. Xasan Muude oo ka mid ah odayaasha tuulada Dibiriq oo 35 km dhanka koofureed uga beegan Ceelwaaq ayaa sheegay in fuustada biyaha horey loo iibin jiray 20,000 oo keli ah kahor inta aysan biyo yaraantu bilaaban horaantii Janawari. “Dadku aad bay u ooman yihiin waxayna halis ugu jiraan in ayba harraad u dhintaan,” ayuu yiri Xasan.
Qaar ka mid ah dadka tuulooyinkaas ku noolaa ayaa hadda u guuraya dhulka webiga ku dhow iyo magaalooyinka biyaha laga heli karo. Dadka deegaanka qaarkoodna jidka weyn ee Ceelwaaq iyo Baardheere isku xira ayey tuban yihiin iyaga oo biyo weydiisanaya gaadiidka jidka ku safraya. Iglan Cabdikariim oo ah hooyo 42 sano jir ah oo shan carruur ah leh waxa ay leedahay biyo hana lagu soo deg dego.
Axmed Cumar Saalixi/MR/FM
