Xarun caafimaad oo adeegyo lacag la’aan ah u fidineysa dadka barakacayaasha ah ayaa laga furay xeryaha Calanley ee magaalada Gaalkacyo. Xaruntan oo bishii hore la furay ayaa adeegyo caafimaad oo isugu jirta dhalmada haweenka iyo daweynta carruurta iyo dadka waa weyn bixin doonta.
Gabadh kormeerto ka ah xaruntaas oo la yiraahdo Fawsiya Axmed Kaarshe ayaa raadiyoow Ergo u sheegtay in sidoo kale dadka xeryaha ku nool ay siinayaan dawooyin iyo talooyin la xariira cudurada shubanka, duumada iyo kuwo neef-mareenka ku dhaca.
Dad barakacayaal ah oo ka badan 850 qoys oo ku nool shan xero ayaa ka faa’iideysan doona xaruntan caafimaad ee la furay. Fawsiya waxa ay sheegtay in hay’adda arrimaha bini aadannimo ee talyaaniga ee la yiraahdo Cesvi ay dhistay isbitaalka, islamarkaasna ay daawooyinka loo baahan yahan keento bil walba.
Toddobaad walba dad ka badan 260 bukaan ayaa xarunta dawooyin iyo talooyin caafimaad ka hela. Dadkaas badidood xeryaha ayey ka yimaadaan laakiin qaarkood baa ah dadka deegaanka ee dariska la ah xeryaha.
Maxamed Saciid/MR/MRS
