Labo aan dhalay oo ah curad iyo curad xige ah oo la kala yiraado Axmed oo 15jir ah iyo Aaden oo 12 jir ah ayaa iga jirraday muddo labo bilood la`eg anngoo ku nool tuulada Taarako oo 50km dhanka waqooyi kaga beegan magaalada Baradheere, oo iska ah dad reer miyi ah oo iska xoolo dhaqato ah. Wax caafimaad ah uma aynan helin. Cuuryaannimo ayaan kaga cabsanayaa, haddana way u muuqdaan. Dhibkaas baa jira. Hadda waxaa keenay magaaladan Baardheere, way iska dhex yaallaan, wax caafimaad ahna kama aysan helin. Waxaa sidaa yiri Hilowle Ismaaciil Faarax oo ah aabbaha dhalay labo wiil oo ay curyaamisay cudurka dabeysha.
Ergo: Dhakhaatiirta maxay ku sheegeen cudurka haya ilmahan?
Hilowle: Adigu dabeyl iyo waxyaabo saas ah in ay ku dhufatay bay dhakhaatiirtu sheegeen. In ay sheegeen ma ahane, hadda wax waxqabad ah ma aysan helin. Wax daawo ahna ma lahan ayay yiraahdeen.
Ergo: Qaabka xanuunku ku bilowday sharraxaad iga sii?
Hilowle: Raggu waa ay qandhadeen oo halmar baa lagu soo wada booday. Qandhada kadib, kaadida baa ku dhagtay. Kadibna xubnaha oo dhan baa suuxay. Afka inay ka dhaq-dhaqaaqaan ma ahane, xubin kale oo nuuxsata ma leh. Dhakhaatiirta waxay yiraahdeen calaamadaha noocaas ah waxaa leh dabeyl. Cudurka dabeyshana sidaas bay dadka yeelaan baa la igu yiri.
Ergo: Hadda, dabeylna wax igu cusub ma ahan oo horay waan u arkay waana u maqlay dad cuuryaamiin ah oo dabeyl baa sidaa ka dhigtay baa la leeyahay. Cudurkaas baan hadda uga cabsanayaa.
Ergo: Carruurtaada horey ma loo tallaalay?
Hilowle: Maya, weligood lama tallaalin.
Ergo: Hadda waxaa ii muuqda labada wiil oo sariiro isku dheggan ku jiifa, ma dad socon kara baa?
Hilowle: Socod warkiis ma jiro. Xubin dhaqaaqiisa ma leh. Xitaa gacan ma nuuxin karaan. Lugahoodu waa meyd oo kale. Afka oo keli ah bay dhaqaaji karaan.
Axmed Cumar Saalixi/MR/FM
