Tirada ardayda ka qalinjabineysa dugsiyada sare iyo dhexe ee deegaannada Maamul goboleedka Soomaaliyeed ee Puntland ayaa aad u kordhay sanadkan.
Madaxa imtixaanaadka ee wasaaradda Waxbarashada Puntland Axmed Warsame Saahid ayaa raadiyaha Ergo u sheegay in soddon boqolkiiba ay kordheen tirada guud ee ardayda u fadhiisatay imtixaanka dugsiyada sare iyo dhexe oo deegaanada puntland ka dhacay toddobaadkii hore.
Axmed Warsame Saahid wuxuu intaa ku daray in tirada guud ee ardayda ka baxaysa fasalada sideedaad iyo afaraad ee dugsiyada dhexe iyo sare ay sanadkan gaareen in ka badan sideed kun iyo shan boqol oo arday. Sanadkii hore lix kun iyo sideed boqol oo arday ayaa u fariisatay imtixaanka ugu dambeeya ee dugsiyada sare iyo dhexe ee deegaannada Puntland.
Axmed Warsame wuxuu sidoo kale Ergo u sheegay in tirada hablaha ka qeybgalaya imtixaanaadka ay sanadkan kordheen iyadoo ay 650 hablodo ka mid yihiin ardaydaas u fariistay imtixaanka dugsiga sare, iyagoo sidaas si l mid ahna saddex kun gabdhood ay ka mid yihiin 6300 arday ah oo u fariistay imtixaanka fasalka siddeed ee ugu dambeeya dugsiga dhexe.
Inkastoo uusan sheegin tirada rasmiga ah ee hablaha u fariistay imtixaanka dugsiyada sare iyo dhexe ee sanadkii hore. Inkastoo gabdhaha weli aysan kala sinnaan wiilasha xagga waxbarashada haddana madaxa imtixaanaadka Puntland uu sheegay in hablihii ugu badnaa imtixaanka ay u fariisteen sanadkan.
Abdirahman Mohamed Haji/MR
