Dhakhaatiir iyo kalkaaliyayaal ka socda isbitaalka jaamacadda Gobolka Mudug ayaa baaritaanno caafimaad iyo daweyn lacag la’aan ah ka fuliyay deegaanno ka tirsan degmada Galdogob.
Dad gaaraya 400 oo qof oo haween iyo caruur u badan ayaa ka faa’iideystay baaritaannada caafimaad iyo daweynta lacag la’aanta ah ee ka socotay deegaannada Buursaalax, Riig oomane iyo Daarasalaam oo ka tirsan degmada Goldogob ee gobolka Mudug afar maalmood toddobaadkii hore.
Agaasimaha Guud ee isbitaalka jaamacadda gobolka Mudug dhakhtar Maxamed Aadan Xuseen oo hoggaaminaya dhakhaatiirka howsha caafimaad fulisay ayaa u sheegay raadiyo Ergo in xanuunnada ugu badan ee bukaannada ay ka daweeyeen ay ahaayeen nafaqa darro, cudurrada maqaarka, shuban biyood, gooryaanada, infakshin iyo dhiig la’aan.
Tuulooyinka adeegyada caafimaad ee lacag la’aan laga fuliyay ma leh xarumo caafimaad oo bukaannada lagu daweeyo, taas oo dhakhtar Maxamed Aadan Xuseen ku sheegay in ay tahay sababta ay adeegyada caafimaad uga fuliyeen.
Dad weynaha tuulada Bursaalax ayaa dhawaan dhameeyay dhismaha guri loogu talo galay inuu noqdo xarun gargaar deg-deg ah iyo bukaan-socotada lagu daweeyo, laakiin isbitaalka weli lama qalabeyn.
Burhan Mohamed Abdi/MR
