Tallaallada cudurrada cagaarshowga iyo xanuunnada ku dhaca maskxada carruurta ee Maskax-garaadka ama manjajiska ayaa markii ugu horreysay Soomaaliya lagu soo biiriyay tallaalladii saddexnaa ee la siin jiray carruurta Soomaaliyeed.
Waxaa gudaha Soomaaliya markii hore carruurta la siin jiray tallaal saddexan oo looga difaaci jiray cudurrada kala ah xiiqdheerta, gowracatada iyo teetanada, waxaana hadda lagu soo kordhiyay cudurrada cagaarshowga iyo maskax-garaadka.
Dr yaasiin Nuur Bile oo ah maamulaha barnaamijka tallaalka fidsan ee wasaaradda adeegga bulshada ee xukuumadda Soomaaliya ayaa sheegay in carruurta Soomaaliyeed %60 laga tallaalay cudurrada dilaaga ah, sidaa darteed haatan ay isla garteen hay`adaha caafimaadka in talaalladii hore ee saddexnaa laga dhigo mid shaneysan.
“%24 dadka Soomaaliyeed waxay u dhintaan cudurka maskax garaadka, halka cagaashowgana toro badan ay u dhintaan, sidaa darteed tallaalkan fursad wanaagsan ayuu u yahay carruurta, si markey weynaadaan uga badbaadaan cudurradan halista ah.” Ayuu yiri Dr Yaasiin.
Tallaalkan ayaa waxaa maalgeliyay hay’adda caafimaadka adduunka ee WHO iyo sanduuqa badbaada carruurta ee UNICEF, waxaana fulinaya wasaaradaha caafimaadka Soomaaliya, Somaliland iyo Puntland, iyadoo lagu beegsan doono tobnaan kun oo carruur ku nool gudaha Soomaaliya, kuwaasoo da`doodu ay ka hooseyso 1 sano jir, sida ay sheegeen howlwadeennada tallaalkan.
Cabdiraxmaan Xaaji/Yuusuf Keynaan/FM
