(ERGO) – Isbitaalka magaalada Baydhabo waxaa jiifa oo shuban-biyood looga daweynayaa 57 qof oo 34 ka tirsan ay carruur yihiin, kuwaas oo uu cudurka soo ritay toddobaadkan, sida uu sheegay Dr Cabdullaahi Yuusuf Bashiir oo ah madaxa dhaqaatiirta ee isbitaalka. Cudurkan ayaa tan iyo dhammaadkii bishii Diseembar ee sanadkii hore ku faafaya xaafadaha magaalada Baydhabo iyo tuulooyinka u dhow ee gobolka Bay.
“Bukaannada waxaan u sameynay teendhooyin aan seexinno, halkaas oo aan kula tacaalno, kuna siinno falmeembooyin iyo fuuq-celiyeyaal,” ayuu yiri dhaqtarka. Wuxuu intaa ku daray in shubanka ay dadka ku arkeen uu yahay mid biyo ah oo jaalle uu ku jiro.
Cudurka ayuu u sababeeyay biyaha ay dadka cabaan oo aan nadaafad ahaan wanaagsaneyn, taas oo ay ugu wacan tahay ceelasha oo biyo-yareeyay roob la’aanta darteed, isla markaana biyaha matoorrada looga soo saarayo ay yihiin kuwo wasaq ah oo u baahan in la daweeyo ka hor inta aan la cabin.
Salaad Xaaji Cabdi oo ah aabbe 41 jir ah wuxuu maalintii saddexaad isbitaalka kula jiraa wiil uu dhalay oo toddobo sano jir ah, kaas oo uu ka keenay xaafadda Cadaadda ee Baydhabo. Wuxuu Raadiyo Ergo u sheegay isla habeenkii uu wiilkiisa ku arkay shuban iyo matag aan kala joogsi lahayn inuu ula soo degdegay isbitaalka. “Sidii ay xaaladdiisa ahayd markii aan arkay isma lahayn way soo hagaagi doontaa, balse markii maalmahan faleembooyin lagu suray wuu soo roonaaday, hadda wuuba hadli karaa,” ayuu yiri.
Wuxuu sheegay tan iyo markii ay bil ka hor go’day tubbo gurigooda ku jirtay oo biyaha ka soo qaadeysay ceel xaafaddooda ku yaalla ay billaabeen in ay cabaan biyo dhanaan oo gaari-dameer uu uga soo dhaamiyo ceel u jira 2 km. Qoyska oo xoolo-dhaqato ah waxaa fuustadii laga siiyaa 60,000 oo shilin Soomaali ah ($2).
Dr Cabdullaahi ayaa xusay in markii ay arkeen dhibaatada biyaha ka taagan iyo sida ay u soo badanayaan kiisaska shubanka ay Talaadadii billaabeen olole ay dawooyin ugu shubayaan meelaha ay dadka biyaha ku keydsadaan iyo ilo-biyoodyada kale. “Waxaa iska kaashanaya isbitaalka iyo wasaaradda caafimaadka ee gobolka,” ayuu yiri.
“Hooyadey iyada oo waayeel ahayd ayaa markii uu shubanka ku dhacay waxay noqotay qof aad u baaba’ay oo caato ah,” ayay Raadiyo Ergo u sheegtay Xaawo Xuseen Axmed oo 38 jir ah. Xaawo oo deggan Baydhabo, markii ay maqashay xanuunka hooyadeed waxay kireysatay bajaaj si ay uga soo qaaddo tuulada Aweys Garwaal oo magaalada u jirta 9 km.
Bukaannada isbitaalka ku jira ayaa qeyb ka ah 147 qof oo 90 ay ahaayeen carruur ay da’dooda ka yar tahay shan sano oo toddobaadkan oo keliya isbitaalka la soo gaarsiiyay, sida uu noo xaqiijiyay dhaqtarka. Dadkan oo qaarkood laga keenay tuulooyinka ayaa laga saaray isbitaalka markii ay caafimaadeen.
