Saraakiisha iyo howlwadeennada qeybta caafimaadka hay`adda WHO ee gobolka Gedo ayaa warbixin ay soo saareen waxay ku sheegeen in carruur tiradoodu ay gaareyso illaa 50,000 da`dooduna ay ka yar tahay 5-sano ay ka tallaaleen lixda cudur ee dilaaga ah, sida dabeysha, jadeecada, xiiqdheerta, teetanada, gowracatada iyo qaaxada, iyagoo sheegay in tallaalkaasi oo soconayay muddo shan maalin ah ay ka fuliyeen degmooyinka Luuq, Ceelwaaq, Doolow, Geedweyne, Baladxaawo iyo dhamaan Tuulooyinka hoos yimaada degmada.
Maxamed Sh. Cali Norad oo ka mid ah mas`uuliyiinta xafiiska hay`adda WHO ee degmada Baardheere oo la hadlayey Raadiyo Ergo ayaa sheegay in hadafkoodu uu yahay sidii loo ciribtiri lahaa cudurradaasi oo faro ba`an ku haya carruur ta Soomaaliyeed.
Tallaalka lixda cudur oo sanadkii la soo dhaafey aanan laga qaban gobolka ayuu Maxamed sheegay inay barbar socotey daawooyin la siinayey caruurta, sida Kaniiniga Vitamin A iyo Kaniiniga gooryaanka, isagoo sheegay in daawooyinkaasina ay difaac u yihiin caruurta soo koreysa.
Ololahan ayaa waxaa ka faa`ideysta sand kasta haween iyo carruur fara badan oo qaarkood ka yimaada dhulka miyiga ah ee ku teedsan degmooyinka gobolka, si looga hortago cudurrada dilaaga ah ee wax yeelleyn kara caafimaadkooda.
Axmed Cumar Saalixi/AA/FM
