Muqdisho:- Waxaan halkan idinkugu soo koobeynaa wareysi ay idaacadda Ergo la yeelatay wasiirka arrimaha gudaha iyo amniga Soomaalia.
Wasiirka arrimaha gudaha iyo amaanka qaranka Soomaaliya Cabdisamed Macalin Maxamuud ayaa radio Ergo u sheegay oo yiri “Dagaalkaan hadda socdaa ma ahan wax cusub, horay ayaa loo sii sheegay, qorshaha dawladda ayey ahayd in ciidamada dawladu u baxaan gobollada, run ahaantiina waan dareemi karnaa meeshii dhibaato ka jirto dadka way taabanaysaa, intii muddo ahna waxaan ilaalinanay dhibaatada dadka, waana qorshaheena taas, waxaanan rajaynaynaa in dadka laftigooda aan u sheegaynaa inay u tabaabushaystaan sidii ay isaga badbaadin lahaayeen intii karaankooda ah dhibaatooyinka dagaallada ee jira”
Dadka deggan xeryaha ku yaal ceelasha biyaha oo ku yaal waddada u dhaxaysa Muqdisho iyo Afgooye ayaa iyaguna sheegaya inay qabaan walaac ballaaran oo dagaalladaan hadda ku sii fidaya degaanaday ku nool yihiin mar kale ay ku keenayaan barakac aysan awood u lahayn.
Xabiibo Axmed waa hooyo deggan xeryaha Ceelasha biyaha, iyadoo radio Ergo la hadlaysa ayey tiri “Runtii dhibaato xoog leh ayey nagu tahay inaa barakacno, afar sano ka hor ayaan soo degnay meshaan, carruur ayaan haystaa, haddana inaan mar kale sii barakaco waxay igu tahay dhibaato baaxad leh”
Mudane Cabdisamed ayaa sheegay inay muhiimadda koowaad siinayaan dadka ku nool xeryahaas, ayna wadeen maalmahaan kulamo ay la lahaayeen hay’addaha gargaarka sidii dadka loo cawin lahaa, looguna samayn lahaa dib u dejin, isagoona ka rajeeyey hay’adaha gargaarka inay guul ka imaan karto.
Mar uu ka hadlayay wasiirku dadka guryaha laga saaray wuxuu sheegay in baahida adeegyada dadweynaha ah ee dadka Soomaaliyeed qabaan ay ka weyntahay dadka guryo ahaanta u deggan dhismayaashii danta guud, wuxuuna kalouu yiri: “Tusaale ahaan meelaha iskuulada ah waxaa deggan ilaa 100 qoys, marka dhibaatada qoysaskaas iyo kumaan carruur ah oo aan haysan goobo ay wax ku bartaan kee muhimmadda leh? waana in la soo celiyaa dhammaan goobihii adeegyada dadweynaha taas baana muhiim u ah sidii dadku u soo kaban
lahaayeen”.
Arrintaan banaynta guryaha dawladda ayaa dhinaca kalena keeni karta inay sii kordhiso tiradda dadka ku barakacay guddaha waddanka. Siday sheegtay hay’adda qaxootiga Qarammada Midoobay ee UNHCR 1.35 milyan oo qof ayaa guud ahaan waddanka ku barakacsan
Dhinaca barakac ka dhaca gobollada ayuu wasiirka arrimaha guduhu sheegay inay dhici karto, ayna hadda wadaan qorshayaal goobahaas sidii gargaar loo gaarsiin lahaa, iyadoo ay jiraan gobollo door ah oo dagaallo waqtigaan ka socdaan.
MH/AMM
