Hoos u dhac ayaa ku yimid qiimaha xoolaha lagu iibiyo ee suuqa degmada Buuhoodle ee gobolka Togdheer. Ibraahim Ismaaciil oo ka mid ah ganacsatada xoolaha ayaa Raadiyoow Ergo u sheegay neefka arriga ah toddobaad kahor la iibinayay hal milyan, afar boqol iyo toddobaatan shilin oo u dhiganta $70. Isla neefkaas ayaa maanta suuqa degmada Buuhoodle la iibinayaa hal milyan iyo kontan kun oo shilin oo u dhiganta $50.
Qiimaha geela ayaa sidoo kale hoos u dhac ku yimid. Faarax Aadan Canshuur oo ka mid ah dalaaliinta xoolaha ee suuqa Buuhoodle ayaa sheegay in neefka geela ah ee toddobaad kahor joogay sideed milyan iyo afar boqol oo shilin oo u dhiganta $400 oo doolar in uu hadda marayo lix milyan, toddobo boqol iyo labaatan kun oo shilin oo u dhigan $320 doolar.
Hoos u dhaca qiimaha xoolaha ayaa lala xariirinayaa dagaalka Yaman ka socda oo hakad-geliyay xoolaha Soomaaliya lagaga dhoofin jiray suuqyada dalka carbeed iyo xilliga bad-xiranka oo ku beegmay xilli soon. Bisha Soon ayaa ka mid ah bilaha xoolaha ugu badan loo dhoofin jiray dalalka carbeed ee Yaman ugu horreyso, xilligaas oo dalabka hilibka xoolahu aad u kordhi jiray.
Si kastaba, xoolahu waa isha dhaqaale ee ay ku tiirsan yihiin bulshada degmada xadka Itoobiya ku taal ee Buuhoodle oo u badan dad xoolo-dhaqato ah, marka laga reebo qoysas yar oo kooban oo dhaqaale dibadaha looga soo diro. Sidaas darteed, Hoos u dhaca qiimaha xoolaha wuxuu ku qasbayaa bulshada deegaanka in xoolo badan qiimo jaban ku iibiyaan si ay u awoodaan inay helaan raashinka ay u baahan yihiin.
Xuseen Aadan oo dhowr neef oo arri ah kasoo safriyay deegaan la yiraa Car-idhaaf oo 17km dhanka waqooyi kaga beegan Buuhoodle ayaa weriyaha Ergo u sheegay in hoos u dhaca qiimaha xoolaha uu barbar socoda qiimo koror ku yimid raashinka la quuto oo sida caadiga ah kordha Soon walba.
“Lacagta aan ka helo arriga aan iibiyo waxaan ku gataa raashin iyo agabka kale ee aan u baahnahay. Maanta intaa ma awoodo waayo qiimaha xoolaha hoos buu u dhacay iyada oo qiimaha cuntada aysan jabin inay kor ku kacdo mooyee,” sidaas waxaa Raadiyoow Ergo u sheegay Xuseen Aadan.
Khadar Cawil Ismaciil
