(ERGO) – Wasaaradda haweenka iyo xuquuqul insaanka maamulka Galmudug ayaa tan iyo dhammaadkii bishii Maarso wacyigelin la xiriirta ka hortagga tacaddiyada loo gaysto haweenka ka wadda xaafadaha magaalada Gaalkacyo, xeryaha barakaca iyo deegaannada Bitaale iyo Docol ee gobolka Mudug.
Abshiro Cali Geeddi oo ah madaxa kahortaga tacadiyada ee u qaabilsan Gobalka mudug Wasaradda Haweenka iyo xaquuqul aadanaha ayaa Raadiyo Ergo u sheegtay in sababta ku kaliftay wacyigelinta ay tahay in Maarso ay kordheen kiisaska kufsiga ee ka dhacay magaalada iyo deegaannada hoostaga.
Waxay wasaaraddu bishii Maarso keliya ah diiwaangelisay 13 kiis oo isku-day kufsi ah, sadddex kiis oo kufsi ah iyo hal kiis oo dhimasho ah.
Dimasho ayaa ka dhacday xaafadda Garsoor ee magaalada Gaalkacyo. Haweenayda la dilay ayaa sababsatay aabbaha carruurteeda oo ay kala tageen. Kiiska haweeneydan ayay sheegtay Abshiro inuu hataan ka socdo maxkamadda Gaalkacyo.
Sidoo kale wasaarada ayaa diwaangelisay 13 kiis oo jirdil ah bishii Maarso gudaheeda.
“Sare u kaca kiisaska tacaddiga waxaa u horseeday wacyigelin la’aanta iyo abaaraha ka jira gobolka oo sababtay in gabdhaha ay socdaan waqti dambe. Sidoo kale gabdhihii oo aan lahayn wax ay ku mashquulaan oo iska wareega magaalada markii ay iskuuladii xireen cudurka Koroona ayaa keentay in lagu la kaco kufsi,” ayey tiri Abshiro.
Wacyigalinta waxaa bulshada gaarsiinaya koox ka socota wasaaradda haweenka oo kaashanaya koox dhaqaatiir gabdho ah.
Kooxdan oo bulshada Galkacyo guri guri ugu tagaya ayaa ku dhiirigelinaya in laga hortago dhibaatada lagu hayo haweenka iyo sidii loogu midoobi lahaa wax ka qabashada tacaddiga.
“Annaga ka wasaarad ahaan waxaan ka caawinaa haweenka la kulma tacaddiga baritaan iyo daaweyn bilaash ah, taasi oo ay naga caawiyaan xaruumaha caafimadka iyo hay’adaha ku yaalla magaalada.”
Abshiro ayaa sheegtay in ay ka shaqeynayaan sidii ay caddaalad u heli lahaayeen gabdhaha tacaddiyada loo geysto.
Caqabadda ugu wayn ayay wasaaraddu ku tilmaamatay inay tahay xeer-Soomaaliga oo odayaashu ka heshiiyaan dhibaatada, iyadoo aan dowr laga siin dumarka ay ku dhacdo iyo laamaha ku shaqada leh.
“Oday dhaqameedyada ayaa ah caqabadaha ugu weyn. Markii aan odayaasha dhahno aan cadaaladda wax ku xallinno waxay na dhahayaan cid aan gabar laga kufsan malahan cid walbo ayaa gabar laga kufsadaa ee annaga ayaa xalineeyno ayay na dhahaan,” ayay tiri Abshiro.
Waxay xustay in wacyigelinta ay kaga gol-leeyihiin sidii haweenka iyo wasaaradda ay xiriir wanaagsan u yeelan lahaayeen si ay u sahlanaato in gabdhuhu ay soo bandhigaan tacaddiyada ku dhaca, caddaaladna ay u helaan.
Abshiro ayaa sheegtay inay wacyigelintooda gaarsiyaan ilaa 10km meel u jirta Galkacyo.
Gabdhaha iyo hooyooyinka la wacyigeliyo ayaa la baraa sida ay isku bedbaadin karaan haddii ay ku timaaddo xaalad damac kufsi.
Waxay sidoo kale waaniyaan gabdhaha loo geysto kufsiga kuwaasi oo ay u sheegaan in kufsiga loo gaystay uusan ahayn dhammaadka nolashooda balse ay rajo weyn ka qabaan.
“Gabdhaha qaar ee kufsiga loo gaystay ayaa jecel inay meesha isaga haajiraan oo meel aan laga aqoonin degaan. Annagu taasi waan ku taageernaa oo xitaa waxaan hirgelinnay qorshe lagu xirfadeynayo gabdhaha tacaddiga loo gaystay,” ayay tiri Abshiro.
Wasaaradda haweenka ayaa gabdhaha tacaddiga loo gaysto waxay bartaa xirfadaha cillaan-saarka iyo sida dharka loo buufiyo si ay isku hilmaamsiyaan wixii ku dhacay, ayna ugu noqoto xirfad ay mustaqbalkooda ugu faa’iideeyaan. Waxay caawimaad ka helaan hay’adaha ka shaqeeya magaalada sida ay Abshiro noo sheegtay.
Waxay intaas ku dartay in markii hore ee wacyigelinta billaabayeen aan la dhageysan jirin oo jidka looga dhaqaaqi jiray balse hadda ay isbeddel dareemeen, isla markaana hoyooyinka ay ugu wacaan carruurtooda si ay ugu dhageystaan wacyigelinta.
