(ERGO) – Faarax Cabdillaahi Xiddig oo saddex toddobaad kahor laga sii daayay xabsiga dhexe ee Qardho wuxuu ku shaqaystaa farsamada cillad-bixinta moobayllada iyo gelinta korontada oo ah xirfad uu bartay intii uu ku jiray xabsiga. Shaqadaan waxay ka caawisay inuu dhaqaale ahaan taageero qoyskiisa oo sabool ah kana kooban saddex gabdhood oo isaga ka yar iyo hooyadiis.
” Alxamdulilaahi Rabil caalamiin waxyaabo badan buu iga baddalay noloshaydii ma garatay , baagamuundadii, kursigii fadhi-ku-dirirka ahaa waan ka raystay; nolol maalmedkaygaan la soo baxaa, waan shaqaystaa ” ayuu yiri
Faarax iyo 40 maxbuus oo kale oo ay xabsiga ku wada xirnaayeen waxay ka faa`iideysteen xirfado ay ku shaqaystaan oo lagu barayo maxaabiista xabsiga ku jirta, sii markii xabsiga laga sii daayo ay ugu shaqaystaan bulshadana ay kula dhex noolaadaan, waxay qaateen tababarro socday muddo labo bil ah oo ay fulinaysay hay’adda maxalliga ah ee KAALO oo kaalmo ka helaysa Midawga Yurub.
kawdii bishaan Abriil ayaa Faarax iyo lix maxbuus oo kale laga sii daayay xabsiga, waxaana xaflad isla maalintaas la qabtay oo lagu soo gabagabaynayay tababbarkooda lagu guddoonsiiyay qalab ay ku shaqaystaan, kaas oo ka kooban qalabka loo isticmaalo cillad- bixinta iyo koronta-gelinta oo ay ku jiraan jaran-jaro, lebiska farsamada korontada oo loogu talagalay badbaadada qofka. Xirfaddaan waxay fursad u siisay Faarax in uu si iskiis ah uga shaqaysto gudaha magaalada, wuxuuna noo sheegay in toddobaadkii uu ugu yaraan afar jeer uu helo macaamiil uu u shaqeeyo.
Mashruucaan waxaa ka faaidaysanaya dadka ay xabsiyadooda ka yar yihiin hal sano iyo bar, kuwaas oo markiiba ku laaban kara la noolaanshaha bulshada. Cabdijaliil Saciid Xaashi oo ah madaxa xafiiska Hay’adda KAALO ee Qardho waxa uu tilmaamey in mashruucaan uu xallinayo sidii dhallinyarada xabsiga ku jirta kor loogu qaadi lahaa kalsoonidooda loona bari lahaa xirfado si marka ay ku laabtaan magaalada ay ugu shaqaystaan.
” Mashruucaan wuxuu xallinayaa caqabad taagnayd oo ahayd in qofkii meesha lagu xiray uusan noqon qof meesha bilaa macne u fadhiya laakiin loo sameeyo xirfad uu ku shaqaysto berri ka maalin marka uu soo baxo. Si loo dhiirigeliyo in xirfadda loogu sii shaqaysto waxaan kala hadalnay in iyagu midoobaan intii isku magaalo joogtaba ay meel furtaan ka bacdina ku shaqaystaan.”ayuu yiri Cabdijaliil.
Ismaacil Cumar ayaa ka mid ah dadka ka faaidaystay Mashruucan, hadda wuxuu ku shaqaystaa xirfadda harqaanka, wuxuuna raadiyo Ergo u sheegay inuusan marna is dhihin weligiis xirfadd aad xabsi ka baratay baad intifaacsan doontaa oo aad ku shaqaysan doontaa.
” Aniga xirfaddan wax baa iga billawnaa aad baana ugu faraxsanahay, waxay ii socotay muddo laba bilood ah, markaan ka soo baxay hay’addu waxay i guddoonsiiy qalbkii aan ku shaqaysan lahaa iyo harqaankii,” ayuu yiri isagoo ku faraxsan sii dayntiisa iyo qalabka la siiyay siduu ugu shaqaysto.
Cabdijaliil Saciid wuxuu raadio Ergo u sheegay in xirfadahan oo kale ay ha`yadda KAALO ka waddo dhammaan xabsiyada waawayn ee Punland sida Boosaaso, Qardho, Garoowe iyo Gaalkacayo. Wuxuuna intaas ku daray in mashruucan hay’adda uu gacan ka gaysanayo in maxaabiista xabsigooda dhamaysta ay helaan xirfado ay bulshada kula laabtaan markii xabsiga laga sii daayo.
