(ERGO) – Ugu yaraan 740 qof ayaa ku barakacay tuulada Madaxdadley dadley oo 90 km dhinaca galbeed ka xigta magaalada Saylac ee gobolka Awdal kaddib daadad ka dhashay robab mahiigaan ah oo ka da’ay. Roobabkan oo da’ayey shan maalmood oo xiriir ah yaa waxaa ka dhashay daadad gaystay qasaaro maaliyadeed.
Sida uu sheegaayo Rooble Axmed Abraar oo guddoomiyaha deegaanka Madaxdadley, daadadka ayaa qaaday ilaa 300 oo neef oo adhi ah iyo 35 neef oo geel ah, sidoo kalena uu baabi’yay ilaa 40 beerood oo ku taallay tuulada.Rooble ayaa sheegay in tuulada oo ay ku noolaayeen 740 qof oo dhamaan ka barakacay tuulada.
Siraad Xasan Cumar waxay ka barakacday gurigeeda oo ku yaalla tuulada. Iyada iyo siddeed carruur ah oo ay dhashay waxay u barakaceen duleedka tuulada.
“Khasaarahaasi wuu na soo gaadhay, guryo fara badan iyo xoolo buu daadku naga qaaday. Aniga waxa iga bakhtiyay lix iyo toban neef “ ayey tiri Siraad.
Sidoo kale waxaa Siraad ka baaba’ay beer ay ugu abuurnayd khudaar iyo masago. Sida ay Raadiyow u sheegtay, Siraad waxaa ay ku beerteeda dayrtaan qarash gaaraya $500.
“Kolay dad iska danyara oo meesha degan baan aheyn oo meelahaasi ka yara anfacsada ayaan aheyn, beerihiina waa naga baaba’een, raashinkiina biyaha ayaa naga qaaday, qoryo ma heysano, dhuxul ma haysano,” ayey tiri Siraad.
