(ERGO) – Faadumo Axmed Macalin iyo boqolaal qoys oo kale oo horay ugu noolaa xeryo ku yaalla magaalada Baardheere ee gobolka Gedo ayaa fataahadda webiga Jubba iyo daadad roobab da’ay qasbeen in mar kale ay barakacaan. Waxaa iyada iyo ku dhowaad afar boqol oo qoys ay degeen xerada Maandeeq oo seddex km dhanka waqooyi kaga beegan magaalada Baardheere.
Faadumo sheegtay inay halkaas u doorbideen in ay ku taallo meel taag ah, kuma haystaan wax ka badan hoy iyo biyo ay cabaan.
“Noloshayda waxba iskama beddelin, duruufihii awal aan ku jirnay ayaan haddana ku jirnaa. Waxaan cunno adigu waa mar hel mar waa weeye, maalintii hal mar ayaan wax cunnaa,” ayay tiri Faadumo oo muddo saddex sano degganayd xerada Maroodilow.
Iyada iyo sagaal carruur ah oo ay dhashay ayay timaamtay inay habeen saq dhexe ay ka carareen hoygooda markii uu daadku guduha.
“Hadde waad iska garan kartaa guryo xun oo cooshado ah ayaan ku jirnay, haddii ay qoyeen dad carruuro haystana aan nahay dhibaatada hadde ka jirta waad dareemi karaa,” ayay tiri Faadumo oo abaartii 2017-dii ku waysay 67 neef oo ari ah taas oo ku qasabtay inay barakac noqoto.
Cabdullaahi Cismaan oo ka mid ah guddiga xerada Maandeeq ee ku taalla duleedka degmada Baardheere ayaa sheegay in dadku ay xeradan ka heli karaan biyo ugu jira haan weyn oo xerada agteeda ku taalla, laakiin aysan haysan cunno, dawo iyo waxbarasho intaba.
“Xeradan markii hore waxaa deganaa 577 qoys haddana waxaa ku soo kordhismay qoysas kale oo ka soo barakacay, intii nolosha bini’aadamka uu ku tiisanaa wax ay haystaan ma laha,” ayuu yiri Cabdullaahi.
Cabdi Xuseen qoyskiisu ka kooban 13 qof waxay ka mid yihiin dadka mar labaad barakacay ee ay saameeyeen fatahaadda iyo daadadka roobka ka dhashay. Waxuu horay u ahaa xoolo-dhaqde iyo beeralay dantu bidday inuu soo galo xero barakac kaddib markii ay ka qasaareen dalagyadii uu beeran jiray, xoolihiina ay kaga dhammaadeen abaaraha. Abaartii 2017-kii ayuu ku waayay 34 neef oo geel ah iyo 57 neef oo ari ah. Qaar ka mid ah qoysaskan waxay xerada ku sugan yihiin muddo 35cisho.
