(ERGO) – Dadka tuulada Karban ee gobolka Gedo ayaa waxaa ay adeegyo caafimaad u raadsadaan magaalada Luuq oo qiyaastii 40km dhanka koonfur-bari ka xigta. Igu yaraan afar ka mid ah dadka deegaanka ayaa u geeriyooday daryeel caafimaad la’aan. Dadkaas waxaa ka mid ahaa Asli Geedi Cabdi oo tuulada ku geeriyootay bishii dabayaaqadii bishii Sebtembar ee sanadkan.
Labo cisho oo ay foolanaysay kaddib ayey Asli ku umul-raacday tuulada, sida uu Raadiyow Ergo u sheegay saygeeda, Mukhtaar Cali Cumar. Mukhtaar waxaa uu sheegay in Asli ay u dhimatay dhiigbax kaddib markii umuliso-dhaqameed ay isku dayday in ay caawiso.
“Way foolatay, labo habeen iyo labo dharaarood ayay foolanaysay, deegaanka isaga ah, waxaa loo waayay gabadha gaadiid lagu sii qaado oo meel lagu geeyo, marka ay taa dhacday, waxaa haweenka meesha joogay isku dayeen in ay wax qaban karaan, maqas bay soo qaateen, biro ayay soo qateen, ilmihii bay ku qabteen, waxaa dhacday inay gabadhi dhiigbax u dhimatay,” ayuu yiri Mukhtaar.
Dadka tuulaada oo iskaashanaayo ayaa ku guulaystay in ay dhistaan xarun caafimaad oo ka kooban afar qol balse ilaa hadda ma aysan helin agabkii iyo dhaqaatiir ka howl gasha. Wadada isku xirta Karban iyo Luuq ayaa ah mid aad u xun oo aysan gaadiidka isticmaali karin. Baabuurta ingeerka ah ee aada tuulada ayaa waxaa lagu ijaaraa lacag u dhaxayso 100-150 doolar.
Amran Cabdulaahi oo ka mid ah dadka deegaanka ayaa sidoo kale Raadiyow Ergo in habaryarteed oo lagu magacaabi jiray Anbiyo Adan Ibrahim ay u geeriyootay adeeg caafimaad labo bilood ka hor. Markii ay xaaladeeda xumaatay ayaa Anbiyo loo soo qaaday magaalada Luuq balse dhaxda ayey ku geeriyootay.
“Labo maalin ayey foolanaysay, Luuq ayaa loo qaaday, iyadi iyo ilmaheedi dhaxdee isku go’een, meeshi ayey ku dhimatay wadadi kaddibaa dib baa loo soo celiyay oo iyadi iyo ilmaheedi oo isku meeday ayaa haddana meeshi lagu aasay,” ayey tiri Amran.
Maryan Aadan ayaa iyana ka mid ah dadka adeeg xumida ka jirto tuulada ay naftooda khatar u gashay. Maryan oo haysta toddobo carruur ah oo kala ah seddex iyo afar gabdhood waxaa tiro labo jeer ah oo ay halis gashay xaallad fool ah awgeed loo qaaday magaalada Luuq.
”Afar bari ayaan foolanayay maalinkii shanaad maqribkeeda ayaa booyad ka timaaday Hargayso oo Buulaxaawo u socotay, ayaa wiilkii labarbaryay booyadii baa la isaaray, dhaxdee ku banjartay haddana bajaaj baa dhaxda la iga horkeenay, labo saac oo habeenimo ayaan isbitaalka tagay,” ayay tiri Maryan.
Xasan Gama’diid Carays oo ah guddomiyaha tuulada ayaa Raadiyow Ergo u sheegay in ay la xiriireen maamulka dagmada Luuq balse ilaa hadda aysan ka helin wax jawaab ah.
”Dhib badan oo xagga cafimaadka ayaa lagu qabaaa, matalan sida haweenka umulaya oo kale kuwo badan oo waxaan ognahay umulraacay dawo la’aan owgeed,” ayuu yiri guddoomiyaha tuulda Karban oo ay ku nool yihiin ilaa 245 qoys.
