(ERGO) – Axmed Isaaq Daahiye waxaa uu ka mid yahay ardayda fursada u heshay fasalka kowaad ee dugsiga sare oo laga dhisay magaalada Ceel-waaq ee gobolka Gado.
Wuxuu Raadiyow Ergo u sheegay in furasadan uga dhigan tahay mid uu ku taamayay inta uu dhiganayey iskuulka dhexe.
“Aad iyo aad ayaan ugu farax sanahay in aan helo waxbarasho sare aniga oo la nool waalidkay, seddex ka mid walaalaheyga iga horeeyay fursadan oo kale ma ayan helin oo waxbarashadii halkaasi ayay ugu tageen,” ayuu yiri Axmed.
Dugsiga ardeyda hadda dhigata oo gaaraya ilaa 55 ardery ayaa 30 ka mid ah ay yahiin gabdho. Waxaa uu iskuulka ka kooban yahay ilaa labo fasal iyo xafiis,tirade.
Leyla Maaxmed Xareed waxay ka mid ahayd arday ugu horaysay eek u biiray dugsigan. Waxay sheegtay in ay ku faraxsan tahay in ay sii wadato waxbarashadeeda.
“Dhamaan ardeyda wax ka barata Ceelwaaq aad ayay u faraxsan yahiin, waayo waxaa soo baxaya iftiinka mustaqbal wanagsan, maaddama Ceelwaaq taariikhada markii ugu horeysay ee laga furo dugsi sare,” ayay tiri Leyla.
Maxamed Aden oo Guddoomiyaha guddida Waalidiinta dugsiga sare ayaa Raadiyow Ergo u sheegay in dhallinyarada deegaanka oo waxbarashada ku soo badanaysa iyo waxbarashada sare oo aanay haysan ay ku kaliftay inay sameeyaan dugsiga sare.
Ibraahin Xasan Mire oo ah Maamulka Iskuulka sare ee laga furey Ceelwaaq ayaa sheegay tirada macalimiinta waxka dhiga inay yahiin ilaa shan macalalin. Wuxuu sheegay in ay mushaar ahaan u siiyaan macalinkiiba lacag u dhaxaysa $170 ilaa $180.
Ardayda iskuulka ayaa bixiya lacag siddeed doolar ah bishiiba, si howlaha iskuulka loogu fuliyo.
Guddoomiye ku xigeenka degmada Ceelwaaq, Sahal Macalin Aden wuxuu Raadiyow Ergo u sheegay in dhallinyarada deegaanka ay ku adkaatay inay waxbartaan markay ka dhameysataan dugsiga hoose dhexe taasina ay ku noqotay caqabad.
