(ERGO) – Koox kalkaaliyeyaal sharci ah ayaa dadka danyarta ah ee ku nool Somaliland ka caawinaysa in ay helaan gargaar dhanka sharciga ah.
Kooxdan oo uu madax u yahay Idiris Cabdi Maxamed oo ka tirsan machadka Horizon oo ah urur maxaliya oo ka shaqeeya deegaannada Somaliland, ayaa labo boqol oo kiis oo ka socda maxkamadaha Somaliland ka difaacaya dad barakacy, kuwa reer miyi ah iyo carruur aan haysan haqaale ay ku qabsadaan qareeno u dooda.
Ururkan ayaa u dooda bulshada danyarta ah ee lagu xidho sifo sharci daro ah. Dadkan ayaa ku kala nool magaalooyinka Hargeysa, Wajaale, Ballugubadle, Boorama, Burco, Gar-adag iyo Caynabo.
Sida uu Idiris Raadiyow Ergo u sheegay, toban kalkaaliyeyaal ayaa dadkan u fududaynaayo in ay xog dhamaystiran ka helaan dambiyada lagu haysto iyo waxa ay u baahan yihiin. Dadkan ayaa intooda badan waxaa lagu soo eedeyay kiisas kala ah, khalkhal amni, tuugonimo, kufsi, dhac iyo lacago deymo ah oo ay bixin waayeen.
Qareennada oo adeeggan u qabta si bilaash ah ayaa sidoo kale dadkan ka caawiya in u sheegaan qaabka ay iskaga difaacaan dambiyada, xuquuqda ay u leeyihiin garsoorka, damaanadda eedeysanayaasha iyo rafcaan qaadashada xukunnada ku dhaca dadka la eedeeyo iyo sida ay u heli lahaayeen adeegyada sharciga waqiga ay ku jiraan maxkamadaha.
“Dadkeennu inta badan sharcigii ma garanayaan, waxa ay xaq u leeyihiin ma garanayaan, wixii ay isku difaaci lahaayeena ma yaqaannaan, u jeedka ugu weyni waa in aanu qofkii dacwadii u dhameyno, haddii dambi uu galeyna la xukumo oo hore ugu dhamaato dacwaddii,”ayuu yiri Idris.
Ururka ayaa ku guulaystay in 126 qof inay bishii u dambeysay kasii daayaan xabsiyada iyo saldhigyada Somaliland. Sodon iyo toddobo ka mid ah dadkaas ayaa ahaa carruur da’doodu ka yar tahay shan iyo toban jir. Daraasad ururku sameeyay laba sano ka hor ayay ku ogaadeen in dadka barakacay, reer miyiga iyo carruur yaryar in aysan kala fahamsanayn maxkamadaha, booliiska iyo xeer ilaalinta. Idiris ayaa sheegay in taa ay ururku ku qasabtay in ay bilaabaan howshaan.
“Kooxdu boqolaal kiis ayay gacanta ku hayaan, qaar baa gar suge ah, qaar baa racfaan qaadanaya, qaar baa xukun sugo ah ama in la fasaxo doonaya, labada xafiis ee Hargeysa iyo Burco ayaa bari iyo galbeed ka shaqeysa,” ayuu yiri Idris.
Dadkii kooxdani ay u doodeen bishii Julaay waxaa ku jira Sakariye Cali Muuse oo xukun la’aan u xidhnaa muddo laba bilood ah. Wiilkan oo ku nool xaafada Sheekh Nuur ee magaalada Hargeysa ayaa loo haystay eedeyn la xidhiidha in uu jabiyay gaadhi wadada marayay.
