(ERGO) – Beero khudaar ah oo ku yaalla ilaa toban deegaan oo ka tirsan gobollada Saaxil, Maroodi-jeex, Awdal iyo Sanaag ee Somaliland ayuu baabi’iyay ayax ku dagay.
Wuxuu ayaxu cunay khudaar isugu jirta batiikh, basbaas, yaanyo, salad, iyo basal, wuxuu sidoo kale baabi’iyay geed-miroodyo ay ku jiraan babaay iyo liin-macaan u abuurnaa beeralayda deegaannada Agabar, Ruqi, Baki, Gargaara, Ceel-Sheekh, Cabdi-Geeddi, Xariirad iyo Dacar-budhuq.
Wasiirka Beeraha ee Somaliland, Axmed Muumin Seed ayaa Raadiyow Ergo u sheegay in aysan haynin khasaaraha rasmiga ah ee ayaxa uu u geystay beeraha, hase yeeshee uu jiro guddi ay u saareen in uu soo ogaado, kaas oo weli ku jira howlo kormeer ah.
“Markii u horeysay waxa uu inaga soo galay dhankaa iyo Waddanka Yamanta, Xagga badda ayuu soo maray, Shamiitada Barbara ama haamaha shidaalka isagga oo socdo unbaa la arkay, dabeetana dadku way nagu soo qeyliyeen, waxaana u dirnay Team wasaaradda beeraha ah, markii danbe waxaa la ii sheegay in uu joogo Dacar budhuq haddana dacar budhuq team kale ayaan u dirnay, GPS bay ka soo qaadeen. Waxaa la igu sheegay haddana dhinacaa iyo Lug-haya, Gargaara ilaa iyo eeriyadaa xeebta ah,” ayuu yiri wasiir Axmed.
Sidoo kale, wasiirka beeraha Somaliland ayaa sheegay in aanay dhankooda waxba ka qaban karin ayaxa, maaddaama aysan haysan qalabkii lagu la tacaali lahaa sida hilikobtaro buufiya sunta la gula dagaalamo ayaxa.
Wasiirka oo aan Taleefanka kula xariirnay ayaa xaqiijiyay in ay la xariireen ururka la dagaalanka ayaxa ee Bariga Afrika oo fadhigiisu uu yahay magaalada Addis Ababa ee dalka Itoobiya ayna filayaan in xubno ka socda ay Somaliland soo gaaraan toddobaadka danbe si ay uga qeyb qaataan la dagaalanka Koran-korta uu ayaxu reebo.
“Dadka unbaa la tacaalayo ma ahee anagu ka Wasaarad ahaan wax aan hadda ka qaban karno ma leh. In aan hay’adaha la kaashano oo koran korta iyo waxyaabaha uu ka tagi karo aan u sii tabaabusheysano ma ahee kan imika wax aan ka qabanay oo la sheegan karo ma jiro” ayuu yiri wasiirka
Sida ay Raadiyow Ergo u sheegeen Iskaashatooyinka deegaannada Agabar, Dacar-budhuq iyo Xariirad wuxuu ayaxa baabi’iyay beero gaaraya 485 beer.
Ismaaciil Saleebaan Cabdi oo ah guddoomiyaha Iskaashatada beeraleyda deegaanka Agabar waxaa uu sheegay in maalmihii u dambeeyay ay gubeen dhirtii u saamaynta ku yeeshay
Axmed Xirsi Bade oo ka mid ah beeraleyda deegaanka Agabar oo 82 KM waqooyi uga beegan magaalada Hargeysa wuxuu ayuxu uu kaga habsaday beertiisa oo cabirkeedu uu yahay 300 oo mitir. .
“Koley ayaxu waxa uu ku yeeshay saamayn badan, beerteyda kaliyana ma ahee bahalku waddan dhan buu qabsaday haddaan kaaga soo qaado tusaale beertaydana waxa uu cunay wax alle iyo wixii geed gaaban ahaa. Basashuu cunay, barbarooniguu cunay, xabxabkii buu cunay. Geedaha waaweyn xataa sida liintii, cambihii, saytuunkii,” ayuu yiri Axmed oo beertiisu uu ayaxa ku degay 19-kii bishii hore ee Juun.
Hal mar oo keliya ayay beeraleyda deegaanka Agabar suuq-geeyeen dalag u soo go’ay tan iyo markii duufaantii Sagar ay ku dhufatay bartamihii sanadkii hore deegaankaas. Axmed oo duufaanta ay ka baabi’isay beertiisa wuxuu rajo ka qabay ka soo kabashada khasaarihii gaaray.
“Muddadii duufaanta ka dambeysay ka soo kabashaan ku jiray, waxaan iibsaday Mashiin $250 ah, waxaan galiyay cagaf, waxaan galiyay tacab, waxaan galiyay shidaal, shaqaalaan galiyay. Cabirka lacagta aan galiyay marka aan qiyaaso shan kun kama yara” ayuu yiri Axmed oo walaac ka muujiyay sida uu uga soo kabsan karo khasaarahaan.
Cabdiqaadir Maxamuud Axmed oo beer ku leh tuulada Agamsaha ayaa isna wuxuu khassare kala kulmay ayaxa, isagoo sidoo kale walaac ka muujiya saamaynta balaaran ee uu ka tegi doono ayax.
“Koron-korta ayaa ka xun ayaxa oo waxay ka dhalataa ugxanta uu ka tago marka roobku da’o, ayaxu wuu duulayaa laakiin koron-kortu dhulka ayay soconaynaa mana kacayso ilaa ay baalal yeelato, muddadaas ay socoto dhammaan way wada cunaysaa dhirta, Soomaalidu waata ku maahmaahda ‘ayax tag een reeb’ markaa iyada ayaa nagaga xun,” Cabdiqaadir ayaa Raadiyow Ergo u sheegay sidaa.
Cabdifitaax Maxamed Mukhtaar
