(ERGO) – Todobo kun oo qoysas barakac ahaa ayaa helay sharciyo dhulka ay deganyihiin ee gudaha magaalada Baydhabo sideeddii bilood ee la soo dhaafay.
Qoysaskani ayaa isugu jira kuwa ku soo cayrtoobay abaarihii ku dhuftay koonfurta Soomaaliya 2016 iyo 2017, iyo kuwii horay u sii degannaa xeryaha lagu barakacay ee ku yaala magaalada.
Maamulka dawladda hoose ee Baydhabo oo taageero ka helaayo hay’adda qaxootiga ee Norway (NRC) ayaa qoys walba siiyay warqada lahaanshiyaha dhulka ay degan yihiin. Dadka warqadaha la siiyay ayaa ku nool 54 xero oo ku yaala daafaha iyo gudaha magaalada.
Markabo Cali Abuukar oo muddo saddex sano ah barakac ku ahayd Baydhabo ayaa ka mid ah dadkaas. Iyada iyo qoyskeeda oo ka kooban 11 qof waxaa la siiyay dhul cabirkiisu yahay 5 mitir oo ku yaala xerada Elbay. Waxa ay halkaas ka dhisteen labo guri oo cooshad ka sameysan.
“Arrinta igu daran oo isoo martay, waxay aheyd saddex maalin iyo seddax habeen qorax iyo dhaxan meel banaan ah aan joognay (kadib) markii la iga soo barakiciyeey meeshi aan deganaa,” ayay tiri Markabo oo toban jeer ka badan laga soo barakicyay xeryo ay horey u degtay. Qoyska Markabo ayaa kusoo biiray xeryaha dadka barakacay ee Baydhabo saddex sanno kahor iyada oo xilligaas kasoo qaxday deegaanka Qansaxdheere ee isla gobolka Bay.
Gudoomiyaha degmada Baydhabo, Cabdilaahi Cali Watiin oo Raadiyo Ergo la hadley ayaa sheegay in arrintaan dhulka loo sharciyeynayo dadkan barakaca ah ay qayb ka tahay dadaalo xal waara loogu raadinayo kumanaan qof oo barakac ku ah gudaha Baydhabo.
“Warqadaha sharciyaysan ee ay wataan waxay tilmaameysaa in dhulka iyagu leeyihiin. Laga ma saari karo dhulka iyagaa leh, iyagaa deganaanayo. Waa iibsan karaan; waa dhisan karaan,” ayuu yiri Cabdilaahi oo la hadlay Raadiye Ergo. Hay’adda NRC ayaa qoysaska ku caawisay $320 doolar oo qoys walba loogu iibiyay dhulka.
Muumino Axmed Cali, oo ah 47 sano jir, waxay sidoo kale ka mid tahay dadka la siiyay sabarloogooyinka ee hadda helay dhul ay degaan.
“Nolol ba hadda dhow ayay inoo bilaabatay waayo barakicin ayaan ka bixi waynay. Marba meel ayaa naga la rarayay. Waxan ogahay habeeno badan oo banaano jiifanaynay. Hadda waan ku faraxnay mar haddiiba dhulka nala sharciyeyay. Waxan ba wali ka haray, fikirkii ahaa in aan dib u noqdo, halkan ayaana ku sii noolaanayaa,” ayay Muumino u sheegtay Raadiyow Ergo.
Muumino iyo 144 qoys ee kale ee kula nool xerada Elbay waxa ay dhammaan heleen sharciga lahaanshiyaha dhulka. Muumino waa beeraley hore oo ka soo barakacday deegaanka Awdiinle.
Yuusuf Siidow Cali waa gudoomiyaha ku-xigeenka xerada Elbay waxaa uu Raadiyo Ergo u sheegay in qoysaska soo barakacay la kulmi jireen jirdil iyo agabkooda oo la boobo xilliyada sida kediska ah loogu qasbo inay ka guuraan xeryaha ay degan yihiin oo ku yaal dhul gaar loo leeyahay. Si kastaba, weli qoysas badan oo ku nool xeryaha dadka soo barakacay ee Baydhabo ma heystaan warqad lahaanshiyaha dhulka ay degan yihiin oo waxa ay u nugul yihiin in la barakiciyo markale.
