Hay’adda maaraynta masiibooyinka Puntland ee HADMA ayaa raadiyo Ergo u sheegtay in deegaannada Puntland ay foodda geliyeen abaar kale oo si toos ah u saameysay. Ilaa 65 kun oo qoys ayaa u bahaan cunto iyo biyo, sida ay muujinayso qiimayntii ugu dambaysay abaarta ee ay bishaan Jannaayo ha’adda ku sameysay gobollada Puntland.
Cabdullahi Cabdiraxmaan Cayrow waa maareeyaha hay’addaas, wuxuu Raadiyo Ergo u sheegay in deegaanno ka mid ah Bari, xeebaha Nugaal iyo dhulka hawdka ah ee Sool ay dayrtii roob-sadeen loona hayaamay, balse inta kale deeganada Puntland aysan helin roob daaqsin leh.
Ilaa 30 hay’adood oo maxalli iyo caalami ah ayaa lacag iyo cunto siinayay reer miyiga ay abaartii sanadihii la soo dhaafay ay wax yeeshay ee inta badan gobolada Puntland. Gargaarkaas oo waxtar u ahaa xoolo-dhaqatada iyo dadka tuulooyinka ayaa ku ekaa bishii Disembar 2018 iyo Janaayo oo sanadkaan ah, sida ay Ergo u sheegtay hay’adda maaraynta masiibooyinka Puntland. Ma jiro qorshe loogu diyaar-garoobay xaaladda abaareed ee mar kale deegaanku fooda gelinayo.
Puntland waxay bishii Nofembar ee sanadkii hore codsi hordhac ah u dirtay daneeyeyaasha Soomaaliya, si isha loogu hayo gargaarna loogu talogalo dadka miyiga ee wajahaya abaarta, sida ay sheegtay HADMA.
Weriyaha Raadiyo Ergo ee magaalada Garoowe Cabdiraxmaan Xaaji ayaa maareeyaha hay’addaas Cabdullahi Cabdiraxmaan Cayrow arrintaan ka wareystay.
