(ERGO) – Aamina Yuusuf Cabdi waa hooyada 7 carruur, waxay kamid tahay tahay qoysaska loo soo raray Dhaamka Sii bakhti. Iyada iyo carruurteeda waxaa hadda hoy u ah aqal cooshad ka sameysan oo ay dib u dhistay kaddib markii aqal kan lamid ah uu gebi ahaanba burburiyey roob todobaadkaan da’ay deegaanka.
Roobka ayaa sidoo kale qaaday raashin wixii ay haysteen oo isugu jiray bur, bariis iyo mesego, hadda maryo iyo baco la isku xir xiray oo ciid ay hareeraha kaga moostay ayey u hoyadaan.
“Annagoo iska kala daadsan oo markii horaba xaaladeena adkeyd ayaa roob nagu soo rogmaday, gogoshii ka qoyday. Buusashkii markii uu roobkii helay xagga hoose iyo xagga saraba way dumeen oo dib ayaan haddana u dhisnay, mase ah wax roob iska xejin kara” ayey tiri Aamina.
Aamina waxay ka mid tahay 100 qoys oo 5 Sebteembar laga saaray xoro ciidanku lahaa oo ku taala Burco, halkaasoo ay deganaayeen muddo 20 sano ah, waxaana dawladda Hoose dejisay goob kale oo dawladdu leedahay oo 9km u jirta magalada.
Waxay qoyska Aamino hadda nolol ahaan ku tiirsan yihiin caawimaad dhinaca raashinka ah oo ay ka helaan dad ay ehel yihiin oo gudaha Burco ku sugan oo mar mar u soo dhiiba raashin. Wixii ka horreeyey intii aysan soo deggin xeradaan cusub oo la dhaho Dhaami-Sii bakhti nolosha qoyska waxay ku tiirsanaayeen miis ay ku iibiyaan bagaashka oo xeradii laga saaray ay ku lahaayeen.
Dhammaan adeegyada aas-aasiga ah sida goobaha waxbarashada iyo caafimaadka labaduba malahan deegaankan.
“Waad u jeedaa suuliya ma lihin, carruurihii jidadkay ku saxaroonayaan, maamulkii na soo rarayna dib noogumaysan soo noqon, dowladda meel aanan u dacwoon oo maamulka ah malahan, welina wax ma hayno” ayey tiri Aamina.
Qoyasaskaani waxay sheegeen in keliya ay dowladda hoose ku caawisay gaadiidkii ay ku soo guurayeen iyo dhulka ay degeen, laakiin aysan jirin wax caawimaad ah oo kale oo ay helaan haddiii ay noqon laheyd guryo loo dhisay ama raashinba.
Guddoomiyaha guddiga arrimaha bulshada dowlada hoose ee Burco Khadar Nuux Siciid ayaa Raadiyow Ergo u sheegay in ay wadaan qorshayaal ilaa 100 guri oo jiingado ka sameysan iyo musqulo ay u dhisi doonaano, welise wax arrintaas ka hir galay ma jirto.
Qoyasaskaan meesha la dejiyey uma dhowa goob waxbarasho, waxayna carruurtoodii yihiin kuwo muddo bil ah aan dugsiyo tegin.
Saado Saleebaan Cige waa hooyo halkan ku heysata 9 caruura ah, hoy la’anata hadda haysata waxaa u dheeg in 6 carruurteeda ka mid ahi aysan mudo bil ah wax waxbarasho ah aadin, waxaana ka mid ah carruurtaas 19 jir ah oo hadda fasalka afraad ee dugsiga sare ee Sheekh Ibraahim dhiganayey.
“Goobtaan nalaga soo raray carruurtu waa iigu wada dhalatay, iskuulka waa ii dhowaa, kii waxbarashada ku bilaabay ayaa hadda dhamayn rabay sanadkaan, gaadiidka taga Burco ee meesha mara sii socod iyo soo socod 2 dollar ayuu qaadanayaa, mana awoodo inaan ka bixiyo, lugna laguma tegi karo” ayey tiri Saado.
Daahir Jaamac Muuse oo kamid ah gudi 10 xubnood ka kooban oo dadkaani samaysteen si ay u helaan hoy sheegay in dadka ay si dhakhso ah ugu baahan yihiin hoy iyo suuliyaa iyo in meel gudaha magaalada la dejiyo si ay qoysaskooda ugu shaqeeyaan, carruurtiina iskuulada dib ugu noqdaan.
