(ERGO) – Xasan Maxamed Dhabar oo 27 sano jir wuxuu ka mid yahay 437 dhallinyaro ah oo ka faa’ideysanaya mashruuc lagu dhisayo labo waddo oo ku yaalla magaalad Baydhabo.
Waxaa mashruuca $700,000 ku maalgelisay hay’adda Nordic International Support Foundation oo laga leeyahay dalka Norway taas oo u wakiilatay maamulka Koofur-galbeed in mashruuca uu fuliyo, sida uu Raadiyo Ergo u sheegay agaasimaha wasaaradda howlaha guud ee maamulka Koofur galbeed Maxamed Suufi Aadan.
Waxaa dadka shaqo abuurka ka loo sameeyay oo uu Xasan ka tirsan yahay laga soo xuley kaamamka dadka barakacay ay deggan yihiin ee magaalada, dadka danyar ah, kuwa ka soo laabtay qaxootiga iyo iskaashatooyinka muruq maalka ah ee magaalada ka xamaasha.
Wuxuu sheegay in bil ka hor inta aanay shaqada bilaabin hay’addu u tababartay isaga iyo dhallinyarada kale sida loo qoro, loo simo, iyo howlaha kale ee dhismaha waddoonyinka, isagoo shaqadan ka maareeyaa nolosha qoyskiisa oo shan ruux ka kooban.
Xasan oo ka soo barakacay deegaanka Deynuunay ee gobolka Baay wuxuu markii hore ka shaqeyn jiray jarista geedaha dhuxusha laga sameeyo oo uu sheegey in laga joojiya bishii March ee sanadkan kaddib amar ka soo baxay Al shabaab. Wuxuu Raadiyo Ergo u sheegay in markaas kaddib ay barakac ahaan u yimaadeen magaalada Baydhabo isaga iyo qoyskiisa oo uun ay sugi jireen raashinka ay hay’adaha u keeni jireen.
“Shaqo qaab leh oo cid lagu biili karo ma haynin, shaxaad iyo gargaar baan ku nooleyn, shaqo abuur fiican baan helaa, maalintii shSo 300-400 oo lacag ah ayaan helnaa, waa ka badan tahay lacagta maalinlaha ah, laakiin waxaan sameeynaa inaan meel dhiganno,” ayuu yiri Xasan.
Waxaa mashruucan oo socon doona lix bil ah ka shaqeeya ku dhowaad labo boqol oo haween oo ay Saynab Maxamed Aadan ka mid tahay. waxay aruurisaa dhagaxda marka raggu jabiyaan, ma ahan shaqo ay horay u qabatay haddana dhib badan, balse waxay sheegtay inay kaga fiican tahay inay xero barakac dhex fadhiso iyada oo aan shaqo qabanaynin.
Labaatan doolar oo ay shaqadan ka hesho waxay $15 sheegtay inay meel dhigato. Waxay rajaynaysaa marka shaqadaan waqtiyayasan ka dhammaato in lacagta u aruurta ay ku samaysato miis ay ku iibiso alaabaha yar yar iyo qudaar.
Saynab oo deegaanka Qansax-dheere ka soo barakacday sanadkii 2017 kaddib abaartii oo ka dhamaysay 45 neef oo ari ah oo ay lahayd, waxay labo carruur ah ku haysataan iyada iyo saygeeda xerada Xanaano ee magaalada Baydhabo.
Waxay sheegtay inuusan jirin hadda ka hor qof qoyskeeda uga soo shaqeeya magaalada oo ay horay ugu tiirsanaayeen xoolahooda abaarta ka hor.
Agaasimaha guud ee wasaaradda howlaha guud, dib u dhiska iyo guriyeynta maamulka Koofur-galbeed Maxamed Suufi Aadan ayaa Raadiyo Ergo u sheegay in mashruucan uu labo faa’iido u yahay bulshada magaalada Baydhabo oo ah in dadku ay shaqo ka helaan, bilicda magaaladuna ay hagaagto.
Wuxuu xusay in maamulku uu hay’adda ka dalbaday inay waddooyinka sameeyaan ayna ka aqbaleen, taas oo uu xusay inay wax ka beddashay dhallinyarada dabiyada fadhiyay ee aan haynin waxay qabtaan.
wuxuu xusay agaasimuhu in mashruucan uu yahay mid tijaabo ah oo haddii lagu guulaysto la samayn doono waddooyinka magaalada oo dhan.
