(ERGO) – Cabsi ayaa ka dhalatay kor-u-kac dhowrkii maalmood ee la soo dhaafay laga dareemayay heerka biyaha ee webiga Shabeelle. Arrintan ayaa ka dambaysay roobabka xoogga leh ee ka da’aya dhulka sare ee Itoobiya. Cabsida ugu badan waxaa dareemaya dadka ku nool gudaha magaalada Beledwayne oo webigu uu dhowr meelood u kala qeybiyo.
Waxaa xusid mudan in weli ay furan yihiin goobihii uu webigu ka fatahay gaar ahaan kuwa ku yaalla hareeraha iyo gudaha magaalada. Bishii Abriil ee sannadkan ayay ahayd markii fatahaad uu webigu sameeyey ay ku barakeceen kumannaan qof.
Pro. Muuse Shaaciye oo la taliye dhinaca fatahaadaha iyo heerarka webiyada u ah hay’adda maamulka biyaha iyo dhulka ee (SWALIM) oo u warramay Raadiyo Ergo ayaa sheegay in gudaha Beledweyne ilaa afar meelood uu webigu ka furan yahay. Kuwaas oo ay ka dhalan karto khatar ah in mar kale biyo dhex fariistaan xaafadaha magaalada.
Pro. Muuse ayaa intaas ku daray in gunta hoose ee webiga ay ciid badan fadhido, taasina ay yaraysay biyo qaadkii webiga. “Waana qeyb kale oo kamid ah sababaha keena fatahaada,” ayuu hadalkiisa raaciyay.
Guud meelaha uu webiga Shabeelle ka maro gudaha Soomaaliya ayuu sheegay in ilaa 50 goobood ay xilligan furan yihiin, inta ugu badana ay ku yaallaan gobollada Hiiraan iyo Shabeellaha dhexe. Halka 124 meelood ee kalena yihiin goobo jilicsan oo webigu qarqarada ka jabsan karo.
Raadiyo Ergo ayaa madaxa arrimaha bulshada ee maamulka gobolka Hiiraan Xuseen Cismaan Cali wax ka waydiisay sababta loo xiray waayay goobaha wali furan, wuxuuna sheegay inaanay xilligan hayn dhaqaalihii ay arrintaas ku qaban lahaayeen.
Dadka magaalada ayaa intooda badan guryohooda dib ugu soo laabtay bishii Julaay ee sannadkan. Sidoo kale magaalada kama jirto habab digniino ah oo ay dadku kula socon karaan heerka biyaha iyo qalab ku xiran webiga oo ay ka fiiriyaan, ayaa hadda dantu ku khasabtay inay iyagu xilli kasta isha ku hayaan xaaladda biyaha webiga, si iyagoo hurda aan daadku ugu soo gelin.
Nuurto Xasan Axmed oo ah hooyo lix carruur ah dhashay, kana mid ah qoysaska ku nool xaafadda Xaawo Taako, ayaa Raadiyo Ergo u sheegtay in agabka gurigeeda u yaalla inta ugu muhiimsan ay xirxiratay xilligan, ayna diyaar u tahay inay carruurteeda la baxdo, haddii webigu uu fatahaad keeno.
Waxay sheegtay inay si joogta ah kormeer ugu tagto webiga, dhowrkii maalmood ee la soo dhaafayna ay dareemayso in biyaha uu webigu wado ay soo xoogaysanayaan. “fatahadii hore carruurta ayaa igaga dhiman gaaray, kaddib markii xilli habeen ah ay biyuhu aqalka noogu soo galeen,” ayay tiri Nuurto.
Magaaladda Beledweyne waxay dhacdaa dooxo uu webiga Shabeelle ku dhex meeraysto, afarta xaafadood ee ugu qadiimsan, uguna dadka badan magaaladda ayaana saaran dacalka webiga. Xaafadaha Hawl wadaag, Kooshin, Xaawo Taako iyo Buundoweyn ayaa ah goobo qararka webigu aad uga jilicsan yihiin, waana meelaha ugu daran ee cabsida fatahaadu ka jirto.
